ന്യൂഡല്ഹി: രാജ്യത്ത് 18 വയസിന് മുകളിലുള്ള എല്ലാവര്ക്കും കോവിഡ് വാക്സിന് സൗജന്യമായി നല്കാനുള്ള പദ്ധതിക്ക് 50,000 കോടിയോളം രൂപ ചെലവ് വരുമെന്ന് കേന്ദ്രസര്ക്കാര്. ഇതിനാവശ്യമായ പണം കൈവശമുണ്ടെന്നും കേന്ദ്ര ധനമന്ത്രാലയ വൃത്തങ്ങള് വ്യക്തമാക്കി.
ആവശ്യത്തിന് പണമുള്ളതിനാല് സൗജന്യ വാക്സിനേഷനായി ഉടന് സപ്ലിമെന്ററി ഗ്രാന്റുകള് തേടേണ്ടതില്ല. രണ്ടാം റൗണ്ടില് പാര്ലമെന്റിന്റെ ശൈത്യകാല സമ്മേളനത്തോടനുബന്ധിച്ച് സപ്ലിമെന്ററി ഗ്രാന്റുകള് ആവശ്യമായി വന്നേക്കുമെന്നും കേന്ദ്രം പറഞ്ഞു.
വാക്സിനേഷന് പൂര്ത്തീകരിക്കാന് വിദേശ വാക്സിനുകളെ ആശ്രയിക്കേണ്ടി വരില്ല. ഭാരത് ബയോടെക്, സിറം ഇന്സ്റ്റിറ്റ്യൂട്ട്, ബയോ-ഇ എന്നിവയുടെ വാക്സിനുകളിലൂടെ ജനങ്ങള്ക്ക് പ്രതിരോധ കുത്തിവെപ്പ് നല്കാന് സാധിക്കുമെന്നും ധനമന്ത്രാലയ വൃത്തങ്ങള് വ്യക്തമാക്കി.