ന്യൂഡല്ഹി: മൂന്നാം ഘട്ട സാമ്പത്തിക പാക്കേജിന്റെ ഭാഗമായി വീട് വാങ്ങുന്നവര്ക്ക് കേന്ദ്രം ആദായ നികുതിയിളവ് പ്രഖ്യാപിച്ചു. രണ്ടു കോടി രൂപ വരെയുള്ള വീടുകള്ക്കാണ് ആനുകൂല്യം ലഭിക്കുക. 2021 ജൂണ് 30 വരെയുള്ള കാലയളവില് വീടു വാങ്ങുന്നവര്ക്കാണ് ആനുകൂല്യത്തിന് അര്ഹത. ആദ്യമായി വീടു വാങ്ങുന്നവരുമായിരിക്കണം.
റിയല് എസ്റ്റേറ്റ് മേഖലയെ ഉത്തേജിപ്പിക്കുന്നതിനും ഡിമാന്റ് കൂട്ടുന്നതിനുമാണ് പദ്ധതി അവതരിപ്പിച്ചത്. മൊത്തം പദ്ധതി ചെലവിന്റെ 10-15ശതമാനം ബാങ്ക് ഗ്യാരണ്ടി നല്കണമെന്ന വ്യവസ്ഥയില് ഇളവു വരുത്തിയത് ഡെവലപര്മാര്ക്ക് ഗുണകരമാകും. പ്രൊജക്ടിന്റെ മൊത്തം മൂല്യത്തിന്റെ മൂന്നു ശതമാനമായാണ് ഇത് കുറയ്ക്കുക. കമ്പനികള്ക്ക് പണലഭ്യത വര്ധിപ്പിക്കാനും കരാറുകാരുടെ ബാധ്യത കുറയാനും ഇത് സഹായിക്കും.