കൊച്ചി: യൂ ട്യൂബര്‍ ഉണ്ണി വ്ളോഗിനെ ജാതീയമായി അധിക്ഷേപിക്കുകയും വധ ഭീഷണി നടത്തുകയും ചെയ്ത സംഭവത്തില്‍ അന്വേഷണം. ഉണ്ണി വ്ളോഗ് നല്‍കിയ സ്വകാര്യ പരാതിയില്‍ എളമക്കര പൊലീസിനോട് അന്വേഷിക്കാന്‍ ആലുവ മജിസ്ട്രേറ്റ് കോടതിയാണ് നിര്‍ദേശം നല്‍കി. ഈ മാസം ജനുവരി 5 നാണ് ഉണ്ണി വ്ളോഗിനെ സംവിധായകനായ അനീഷ് അന്‍വര്‍ ജാതിപരമായി അധിക്ഷേപിക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്തത്.
അനീഷ് അന്‍വര്‍ സംവിധാനം ചെയ്ത ചിത്രത്തെ കുറിച്ച് അഭിപ്രായം പറഞ്ഞതാണ് അദ്ദേഹത്തെ പ്രകോപിപ്പിച്ചതെന്നാണ് പരാതിയില്‍ ഉന്നയിക്കുന്നത്. സംഭവത്തില്‍ ഉണ്ണി വ്ളോഗ് പൊലീസില്‍ പരാതിപ്പെട്ടിരുന്നെങ്കിലും പൊലീസ് നടപടിയെടുത്തില്ല. തുടര്‍ന്നാണ് ഉണ്ണി വ്ളോഗ് ആലുവ മജിസ്ട്രേറ്റ് കോടതിയെ സമീപിച്ചത്. ഉണ്ണി വ്ളോഗിന് വേണ്ടി അഭിഭാഷകനായ മുഹമ്മദ് ഇബ്രാഹിം ഹാജരായി.
