കോഴിക്കോട്: കാർ വാങ്ങാൻ വീട്ടിൽ എത്തിയവർ ഉടമസ്ഥന് കൊടുത്തത് എട്ടിന്റെ പണി. കാർ പരിശീലന ഓട്ടം നടത്തുന്നതിനിടയില്‍ കാറുമായി കടന്നുകളഞ്ഞതായാണ് പരാതി. മന്ദങ്കാവിലെ പുവ്വമുള്ളതില്‍ ചോയിക്കുട്ടിയാണ് ബാലുശ്ശേരി പോലീസില്‍ പരാതി നല്‍കിയത്. കാർ വാങ്ങാനായി രണ്ട് യുവാക്കളായിരുന്നു വീട്ടിൽ എത്തിയത്.
കെ.എല്‍. 13.ടി. 3141 നമ്പറിലുള്ള ഷെവര്‍ലെ അവിയോ കാറുമായാണ് ഇവർ കടന്നുകളഞ്ഞത്. മാത്രമല്ല 1,90,000 രൂപയ്ക്ക് കച്ചവടം ഉറപ്പിക്കുകയും ഒരുലക്ഷം രൂപ മുന്‍കൂര്‍ നല്‍കാന്‍ സമ്മതിക്കുകയും ചെയ്തു. എന്നാല്‍ ഇതിനിടയിലാണ് കാറിന്റെ ക്ഷമത പരിശോധിക്കാന്‍ താക്കോല്‍ ചോദിച്ചുവാങ്ങിയ ഇരുവരും കാര്‍ ഓടിച്ചുപോയത്.
തിരിച്ചെത്താന്‍ വൈകിയപ്പോള്‍ ഫോണിൽ ബന്ധപ്പെടാന്‍ ശ്രമിച്ചെങ്കിലും ലഭിച്ചില്ലെന്നാണ് ഉടമ പരാതിയില്‍ പറയുന്നത്.
