കണ്ണൂര്‍: കണ്ണൂരില്‍ പണം മോഷ്ടിച്ചെന്നാരോപിച്ച് പത്ത് വയസ്സുകാരന് നേര്‍ക്ക് അമ്മയുടെ ക്രൂരത. പണം മോഷ്ടിച്ചെന്ന ആരോപണം ഉന്നയിച്ച് കുട്ടിയുടെ ശരീരത്തില്‍ അമ്മ ചട്ടുകം കൊണ്ട് പൊള്ളിക്കുകയായിരുന്നു.
കണ്ണൂര്‍ പയ്യന്നൂര്‍ മാതമംഗലത്താണ് സംഭവം നടന്നത്. മാതമംഗലം ഗവ. ഹൈസ്‌കൂളിലെ അഞ്ചാം ക്ലാസ് വിദ്യാര്‍ത്ഥിയുടെ കൈയ്യിലും കാലിലും പുറത്തുമാണു പൊള്ളലേറ്റിരിക്കുന്നത്. അമ്മ ചട്ടുകം പഴുപ്പിച്ചുവെച്ചാണ് പൊള്ളിച്ചതെന്നു കുട്ടി പൊലീസിനു മൊഴി നല്‍കിയിട്ടുണ്ട്.
അച്ഛന്‍ മരിച്ച കുട്ടി അമ്മയോടൊപ്പമായിരുന്നു താമസിച്ചിരുന്നത്. പൊള്ളലേറ്റ വിവരം അറിഞ്ഞ അമ്മൂമ്മ തന്റെ വീട്ടിലേക്കു കഴിഞ്ഞദിവസം കുട്ടിയെ കൂട്ടികൊണ്ടു പോയി പച്ചമരുന്ന് ചികിത്സ നല്‍കിയിരുന്നു. എന്നാല്‍ കുട്ടിയുടെ ശരീരത്തിലെ വ്രണം നാട്ടുകാരുടെ ശ്രദ്ധയില്‍പെട്ടതോടെയാണു വിവരം പുറംലോകം അറിയുന്നത്. തുടര്‍ന്ന് നാട്ടുകാരാണ് പൊലീസിലും ചൈല്‍ഡ് ലൈനിലും വിവരം അറിയിച്ചത്.
