കൊച്ചി: ഉപഭോക്തക്കള്ക്ക് തിരിച്ചടിയായി പ്രീപെയ്ഡ് ഡേറ്റ താരിഫുകളുടെ ഉപയോഗ സമയം വെട്ടിക്കുറച്ച് ബിഎസ്എന്എല് പ്ലാന് റിവിഷന്. 2 ജി/3 ജി പ്ലാനുകളിലെ എറ്റവും കൂടുതല് ഉപയോക്ത്താക്കളുള്ള ഓഫറുകളായ എസ് ടി വി 68, 155, 198, 252 എന്നിവയിലാണു ബിഎസ്എന്എല് മാറ്റം കൊണ്ടുവന്നിരിക്കുന്നത്.
പുതിയ മാറ്റമനുസരിച്ച് ഒരു ജിബി മൂന്നു ദിവസം വാലിഡിറ്റി ഉണ്ടായിരുന്ന ഡേറ്റ 68 ന്റെ കാലാവധി രണ്ട് ദിവസമായി കുറച്ചു. 155 രൂപയ് ക്ക് 20 ദിവസം ഒരു ജിബി എന്നുള്ളത് ഇനി 18 ദിവസമായി കുറയും. 198 രൂപയ് ക്ക് 1.1 ജിബി 28 ദിവസം എന്നുള്ളത് 1 ജിബി അക്കി കുറച്ചു. 252 രൂപയ് ക്ക് 2.2 ജിബി 28 ദിവസം എന്ന പ്ലാന് തുക 292 ആയി ഉയര്ത്തി.
ചെറിയ തുകയ് ക്ക് കൂടുതല് ഡേറ്റ എന്ന രീതില് ബിഎസ്എന്എല് അവതരിപ്പിച്ച 68 രൂപയ്ക്ക് ഒരു ജിബി എന്ന പ്ലാനിന്റെ മാറ്റമാണു ഇതില് എറ്റവും ശ്രദ്ധേയം. കഴിഞ്ഞ ഏപ്രിലില് 10 ദിവസം വാലിഡിറ്റിയില് ഒരു ജിബി എന്ന നിലയില് അവതരിപ്പിച്ച പ്ലാന് 7 ദിവസം, 5 ദിവസം, 3 ദിവസം എന്നിങ്ങനെ കാലാവധി വെട്ടിക്കുറച്ച് ഇപ്പോള് 2 ദിവസമായി ചുരുക്കി. 13 നു പുതിയ പ്ലാനുകള് നിലവില് വരും.