ഫിറോസ്പൂര്‍: പഞ്ചാബിലെ ഇന്ത്യാ-പാക്ക് അതിര്‍ത്തിയില്‍ നാലു മയക്കുമരുന്നു കള്ളക്കടത്തുകാരെ ബിഎസ്എഫ് വെടിവച്ചു കൊന്നു. കൊല്ലപ്പെട്ടവരില്‍ രണ്ടുപേര്‍ പാക്കിസ്ഥാന്‍കാരും രണ്ടുപേര്‍ ഇന്ത്യക്കാരുമാണ്. ഇവരില്‍ നിന്നും 10 കിലോ മയക്കുമരുന്നും പിടിച്ചെടുത്തു.
ഇന്ത്യാ-പാക് അതിര്‍ത്തിയിലെ മെഹന്തിപൂര്‍ ഗ്രാമത്തില്‍ ഇന്നു പുലര്‍ച്ചെ 4.40 ഓടെയാണ് സൈന്യം ഇവരെ വെടിവച്ചു വീഴ്ത്തിയത്. മയക്കുമരുന്ന് കടത്താന്‍ ശ്രമിക്കവെയാണ് ഇവര്‍ കൊല്ലപ്പെട്ടത്. കൊല്ലപ്പെട്ടവരില്‍ ഇന്ത്യക്കാര്‍ മയക്കുമരുന്ന് വാങ്ങാനെത്തിയവരും പാക്കിസ്ഥാനില്‍ നിന്നുള്ളവര്‍ വില്‍ക്കാനെത്തിയവരുമെന്നാണ് പ്രാഥമിക വിവരം. കൊല്ലപ്പെട്ട രണ്ടു ഇന്ത്യക്കാരെ ഇതുവരെ തിരിച്ചറിഞ്ഞിട്ടില്ല.
സംഭവസ്ഥലത്തു നിന്നും രണ്ടു തോക്കുകളും ഒരു മോട്ടോര്‍സൈക്കിളും കണ്ടെടുത്തിട്ടുണ്ട്. സംഘത്തിലുണ്ടായിരുന്നവരില്‍ ഒരാള്‍ പാക്കിസ്ഥാനിലേക്ക് തിരികെ പോയതായി സംശയിക്കുന്നതായി ബിഎസ്എഫ് മേധാവി ആര്‍.കെ. താഫ അറിയിച്ചു.
