വമ്പൻമാരെ ഇന്ത്യയിൽ അവതരിപ്പിക്കാൻ ബിഎംഡബ്ല്യു

2023 ജനുവരി 7-ന് പ്രാദേശിക വിപണിയിൽ രണ്ട് പുതിയ മോഡലുകളായ 7 സീരീസ്, i7 എന്നിവ അവതരിപ്പിക്കാൻ ബിഎംഡബ്ല്യു തയ്യാറെടുക്കുന്നു. ഈ വർഷം ഏപ്രിലിൽ പുറത്തിറക്കിയ പുതിയ ബിഎംഡബ്ല്യു 7 സീരീസ് ഇതിനകം തന്നെ ഇന്ത്യയിൽ കണ്ടുകഴിഞ്ഞു . സ്പ്ലിറ്റ് ഹെഡ്‌ലാമ്പുകൾ, വലിയ കിഡ്‌നി ഗ്രിൽ, പുതിയ ഫ്രണ്ട് ആൻഡ് റിയർ ബമ്പറുകൾ, പുതിയ അലോയ് വീലുകൾ തുടങ്ങിയവയോടു കൂടിയ സമൂലമായ പുതിയ ഡിസൈൻ അപ്‌ഡേറ്റ് ചെയ്‍ത സെഡാന് നൽകിയിരിക്കുന്നു.

മൈൽഡ് ഹൈബ്രിഡ് സിസ്റ്റവും രണ്ട് പ്ലഗ്-ഇൻ ഹൈബ്രിഡ് പവർട്രെയിനുകളും ഉള്ള 3.0 ലിറ്റർ ഡീസൽ മോട്ടോർ ഉൾപ്പെടെ മൂന്ന് എഞ്ചിൻ ഓപ്ഷനുകളോടെ 2023 ബിഎംഡബ്ല്യു 7 സീരീസ് വാഗ്ദാനം ചെയ്യാവുന്നതാണ്. മറുവശത്ത്, i7 രണ്ട് ഇലക്ട്രിക് മോട്ടോറുകളുമായി ജോടിയാക്കിയ 101.7kWh ബാറ്ററി പാക്ക് ഉപയോഗിച്ച് മുന്നോട്ട് കൊണ്ടുപോകും. ഒറ്റ ചാർജിൽ 450 കിലോമീറ്റർ റേഞ്ച് നൽകുമെന്ന് അവകാശപ്പെടുന്നു.

അകത്ത്, 14.9 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 12.3 ഇഞ്ച് ഫുൾ ഡിജിറ്റൽ ഇൻസ്ട്രുമെന്റ് കൺസോൾ, 5.5 ഇഞ്ച് ടച്ച്‌സ്‌ക്രീൻ യൂണിറ്റുകൾ പിൻവശത്തെ ഡോർ ഹാൻഡിൽ, പുതിയ ഫ്ലാറ്റ്-ബോട്ടം സ്റ്റിയറിംഗ് തുടങ്ങിയ സവിശേഷതകൾ ബിഎംഡബ്ല്യു 7 സീരീസിനും i7 നും ലഭിക്കും.

കമ്പനിയിൽ നിന്നുള്ള മറ്റ് വാർത്തകൾ പരിശോധിക്കമ്പോൾ അടുത്തിടെ ബിഎംഡബ്ല്യുവിന്റെ പുതിയ മുൻനിര എസ്‌യുവിയായ എക്സ് എം ഇന്ത്യൻ വിപണിയിൽ അവതരിപ്പിച്ചിരുന്നു. 2.60 കോടി രൂപയാണ് ബിഎംഡബ്ല്യു എക്‌സ്‌എമ്മിന്റെ എക്‌സ് ഷോറൂം വില . 2022 സെപ്റ്റംബറിൽ ആഗോളതലത്തിൽ ആദ്യമായി അനാച്ഛാദനം ചെയ്‍ത മോഡലാണിത്. 1978-ൽ പുറത്തിറക്കിയ ഐതിഹാസികമായ M1-ന് ശേഷം M ബ്രാൻഡിന് കീഴിലുള്ള രണ്ടാമത്തെ ഉൽപ്പന്നമാണ് XM. പ്ലഗ്-ഇൻ ഹൈബ്രിഡ് സാങ്കേതികവിദ്യയിൽ M ബ്രാൻഡിൽ നിന്ന് വരുന്ന ആദ്യത്തെ എസ്‍യുവി കൂടിയാണ് XM.

ഇരട്ട-ടർബോചാർജ്‍ഡ് 4.4 ലിറ്റർ പെട്രോൾ എഞ്ചിനാണ് എക്‌സ്‌എമ്മിന് കരുത്തേകുന്നത്. ഇത് 644 ബിഎച്ച്പി പരമാവധി കരുത്തും 800 എൻഎം പരമാവധി ടോർക്കും സൃഷ്‍ടിക്കുന്നു. എഞ്ചിൻ 8-സ്പീഡ് ഓട്ടോമാറ്റിക് ട്രാൻസ്മിഷനുമായി ഘടിപ്പിച്ചിരിക്കുന്നു. കൂടാതെ ഒരു പ്ലഗ്-ഇൻ ഹൈബ്രിഡ് സിസ്റ്റവും ഉണ്ട്. ബാറ്ററി പാക്കിന് 25.7 kWh ശേഷിയുണ്ട്, കൂടാതെ 88 കിലോമീറ്റർ വരെ ശുദ്ധമായ വൈദ്യുതിയിൽ പ്രവർത്തിക്കാൻ XM-നെ ഇത് പ്രാപ്‍തമാക്കുന്നു. 7.4 kW എസി ഫാസ്റ്റ് ചാർജർ ഉപയോഗിച്ച് ബാറ്ററി ചാർജ് ചെയ്യാം. ബിഎംഡബ്ല്യു XM-ന്റെ പരമാവധി വേഗത മണിക്കൂറിൽ 250 കിലോമീറ്ററായി പരിമിതപ്പെടുത്തിയിരിക്കുന്നു. എം ഡ്രൈവർ പാക്കേജ് തിരഞ്ഞെടുക്കുകയാണെങ്കിൽ, പരമാവധി വേഗത മണിക്കൂറിൽ 270 കിലോമീറ്ററായി ഉയർത്താം. പൂജ്യത്തിൽ നിന്നും 100 കിമി വേഗം ആർജ്ജിക്കാൻ 4.3 സെക്കൻഡുകൾ മതി.