ബംബോലിം: ഐഎഎസ്എല്ലില്‍ പ്ലേ ഓഫ് സാധ്യത സജീവമാക്കാന്‍ വിജയം അനിവാര്യമായ നിര്‍ണായക പോരാട്ടത്തില്‍ ചെന്നൈയിന്‍ എഫ് സിയെ എതിരില്ലാത്ത മൂന്ന് ഗോളുകള്‍ക്ക് തകര്‍ത്ത് കേരളാ ബ്ലാസ്റ്റേഴ്സ്.
ആദ്യ പകുതിയില്‍ നഷ്ടമാക്കിയ അവസരങ്ങള്‍ക്ക് രണ്ടാം പകുതിയില്‍ എണ്ണം പറഞ്ഞ രണ്ട് ഗോളുകളിലൂടെ ജോര്‍ജെ പെരേര ഡയസും ക്യാപ്റ്റന്‍ അഡ്രിയാന്‍ ലൂണയും നേടിയ ഗോളുകളിലാണ് ബ്ലാസ്റ്റേഴ്സ് ജയിച്ചു കയറിയത്.
ഗോള്‍രഹിതമായ ആദ്യുപകുതിക്ക് ശേഷമായിരുന്നു രണ്ടാം പകുതിയുടെ തുടക്കത്തിലെ ബ്ലാസ്റ്റേഴ്സ് മൂന്ന് മിനിറ്റിന്റെ ഇടവേളയില്‍ രണ്ട് ഗോളടിച്ച് ജയം ഉറപ്പിച്ചത്. 52, 55 മിനിറ്റുകളിലായിരുന്നു ഡയസ് ചെന്നൈയിന്‍ വല കുലുക്കിയത്. ഇഞ്ചുറി ടൈമിന്റെ ആദ്യ മിനിറ്റില്‍ ക്യാപ്റ്റന്‍ അഡ്രിയാന്‍ ലൂണ ഫ്രീ കിക്കിലൂടെ ചെന്നൈയിന്‍ വല കുലുക്കി ബ്ലാസ്‌റ്റേഴ്‌സിന്റെ ഗോള്‍പ്പട്ടിക പൂര്‍ത്തിയാക്കി.
ഈ വിജയത്തോടെ ബ്ലാസ്റ്റേഴ്സിന് 18 മത്സരങ്ങളില്‍ നിന്ന് 30 പോയന്റായി. പട്ടികയില്‍ നാലാം സ്ഥാനത്തുള്ള ബ്ലാസ്റ്റേഴ്സിന് സെമിഫൈനല്‍ പ്രതീക്ഷ നിലനിര്‍ത്താന്‍ ഇനിയുള്ള മത്സരങ്ങളിലും വിജയം അനിവാര്യമാണ്. 35 പോയന്റോടെ പട്ടികയില്‍ ഒന്നാം സ്ഥാനത്തുള്ള ഹൈദരാബാദ് സെമിഫൈനല്‍ യോഗ്യത നേടിയിട്ടുണ്ട്.
