മുംബൈ: ലൈംഗിക പീഡന കേസില് പൊലീസ് ലുക്കൗട്ട് നോട്ടീസ് പുറപ്പെടുവിച്ചു. മുംബൈ പൊലീസാണ് ലുക്കൗട്ട് നോട്ടീസ് പുറപ്പെടുവിച്ചത്. നാളെ ജാമ്യം ലഭിച്ചില്ലെങ്കില് പ്രതി വിദേശത്തേക്ക് കടന്നേക്കുമെന്ന് സൂചന കിട്ടിയതോടെയാണ് പൊലീസിന്റെ ഈ നീക്കം.
വിമാനത്താവളങ്ങളില് ബിനോയിയുടെ പാസ്പോര്ട്ട് രേഖകള് നല്കും. പീഡന കേസില് അറസ്റ്റിലാകാതിരിക്കാന് ബിനോയ് കോടിയേരി നല്കിയ മുന്കൂര് ജാമ്യ ഹര്ജിയില് മുംബൈ ഡിന്ഡോഷി സെഷന്സ് കോടതി നാളെ വിധി പറയാനിരിക്കെയാണ് നടപടി. ജഡ്ജി അവധിയില് ആയതിനാലാണ് ഉത്തരവ് നാളത്തേക്ക് മാറ്റിയത്.
കേസില് ബലാത്സംഗക്കുറ്റം നിലനില്ക്കില്ലെന്ന് വാദിച്ച പ്രതിഭാഗം യുവതിയുടെ പരാതിയിലെ പൊരുത്തക്കേട് ചൂണ്ടിക്കാണിച്ചിരുന്നു. ജാമ്യം കിട്ടിയാല് ബിനോയ് പൊലീസ് അന്വേഷണത്തോട് സഹകരിക്കുമെന്നാണ് സൂചന.
അതേ സമയം വിവാഹ വാഗ്ദാനം നടത്തി ലൈംഗികമായി ചൂഷണം ചെയ്യുന്നത് പീഡനത്തിന്റെ പരിധിയില് വരുന്ന കുറ്റമാണെന്ന് പ്രോസിക്യൂഷന് വാദിച്ചു. നിലവില് അറസ്റ്റിന് കോടതി വിലക്ക് ഇല്ലെങ്കിലും കോടതി തീരുമാനം വരും വരെ കാത്തിരിക്കാനാണ് പൊലീസ് തീരുമാനം.