മുംബൈ: ഭീമാകൊറേഗാവ് കേസില് അറസ്റ്റിലായ സാമൂഹ്യ പ്രവര്ത്തകനും കവിയും അദ്ധ്യാപകനുമായ വരവര റാവുവിനെ ജയിലില് നിന്ന് ആശുപത്രിയിലേക്ക് മാറ്റാന് ഉത്തരവിട്ട് മുംബൈ ഹൈക്കോടതി. മുംബൈ നാനാവതി ആശുപത്രിയിലേക്ക് മാറ്റാനാണ് ഉത്തരവ്. കോടതിയുടെ അനുമതിയില്ലാതെ ആശുപത്രിയില് നിന്ന് ഡിസ്ചാര്ജ് ചെയ്യരുതെന്നും കോടതി നിര്ദ്ദേശിച്ചു. ആശുപത്രിയില് കുടുംബാംഗങ്ങള്ക്ക് വരവര റാവുവിനെ കാണാനും അനുമതി നല്കി.
81കാരനായ വരവര റാവുവിന്റെ ആരോഗ്യ സ്ഥിതി ഗുരുതരമാണെന്നും അദ്ദേഹം മരണക്കിടക്കയിലാണെന്നും അഭിഭാഷക ഇന്ദിര ജയ്സിംഗ് വാദിച്ചു. ആശുപത്രിയിലേക്ക് മാറ്റുന്നതിനെ മഹാരാഷ്ട്ര സര്ക്കാര് എതിര്ത്തില്ല. നാനാവതി ആശുപത്രിയിലേക്ക് മാറ്റരുതെന്ന എന്ഐഎയുടെ ആവശ്യം കോടതി തള്ളി. കേസ് ഡിസംബര് 3ലേക്ക് മാറ്റിവെച്ചു.