ബഹ്‌റൈന്‍: ബഹ്‌റൈനില്‍ ഉച്ചവിശ്രമ നിയമം ഇന്നു മുതല്‍ പ്രാബല്യത്തില്‍ വരും. ഓഗസ്റ്റ് 31 വരെയാണ് നിയമം നിലനില്‍ക്കുന്നത്. ഉച്ചയ്ക്ക് 12 മണിക്കും വൈകിട്ട് നാലിനും ഇടയില്‍ തുറസ്സായ സ്ഥലങ്ങളില്‍ ജോലി ചെയ്യുന്നത് നിരോധിക്കുന്നതാണ് നിയമം.
സൂര്യാഘാതത്തില്‍ നിന്നും വേനല്‍ക്കാല രോഗങ്ങളില്‍ നിന്നും തൊഴിലാളികളെ സംരക്ഷിക്കാനാണ് ബഹ്‌റൈന്‍ അധികൃതര്‍ ഈ നിയമം നടപ്പിലാക്കിയിരിക്കുന്നത്.
നിയമം നടപ്പിലാക്കുന്നതിന് ആവശ്യമായ തയ്യാറെടുപ്പുകള്‍ സ്വീകരിച്ചതായി തൊഴില്‍, സാമൂഹിക വികസന മന്ത്രാലയം അറിയിച്ചു. നിയമം നടപ്പിലാക്കുന്നുണ്ടോയെന്നറിയാന്‍ തൊഴിലിടങ്ങളില്‍ പരിശോധന നടത്തും. നിയമം ലംഘിക്കുന്ന തൊഴിലുടമകള്‍ക്ക് മൂന്ന് മാസം തടവുശിക്ഷയോ 500ദിനാര്‍ മുതല്‍ 1,000 ദിനാര്‍ വരെ പിഴയോ നല്‍കേണ്ടി വരുമെന്ന് അധികൃതര്‍ അറിയിച്ചു.
