മെൽബൺ: ഓസ്‌ട്രേലിയയ്‌ക്കെതിരായി നാളെ ആരംഭിക്കുന്ന ബോക്സിങ് ഡേ ടെസ്റ്റിനുള്ള ഇന്ത്യൻ ടീമിനെ പ്രഖ്യാപിച്ചു. യുവതാരം ശുഭ്മാൻ ഗില്ലും പേസർ മുഹമ്മദ് സിറാജും നാളെ അരങ്ങേറ്റ മത്സരത്തിലുണ്ടാകും. വിരാട് കോലിയുടെയും മുഹമ്മദ് ഷാമിയുടെയും അഭാവത്തിലാണ് താരങ്ങൾക്ക് അവസരം ലഭിച്ചത്. എന്നാൽ ഓപ്പണർ പൃഥ്വി ഷാ ടീമിലില്ല. ഫിറ്റ്നസ് ടെസ്റ്റ് പാസ്സായ രവീന്ദ്ര ജഡേജ വീണ്ടും ഗ്രൗണ്ടിലിറങ്ങും. വൃദ്ധിമാൻ സാഹയ്ക്കു പകരം ഋഷഭ് പന്തും കളിക്കാനിറങ്ങും.
ബിസിസിഐ പുറത്തുവിട്ട ടീം ലൈനപ്പ് പ്രകാരം വിരാട് കോലിക്കു പകരക്കാരനായി ഹനുമാ വിഹാരി നാലാമത് ഇറങ്ങാനാണു സാധ്യത. ഓസ്ട്രേലിയയ്ക്കെതിരായ സന്നാഹ മത്സരങ്ങളിൽ വിഹാരി നാലാമനായി ബാറ്റിങ്ങിന് ഇറങ്ങിയിരുന്നു. ക്യാപ്റ്റൻ അജിൻക്യ രഹാനെ ബാറ്റിങ്ങിൽ അഞ്ചാമനായേക്കും. രവീന്ദ്ര ജഡേജയും ആർ. അശ്വിനുമാണ് സ്പിന്നർമാരായുള്ളത്. രണ്ടാം ടെസ്റ്റിനുള്ള ഇന്ത്യൻ ടീം– അജിൻക്യ രഹാനെ (ക്യാപ്റ്റൻ), ശുഭ്മാൻ ഗിൽ, മായങ്ക് അഗർവാൾ, ചേതേശ്വര്‍ പൂജാര, ഹനുമാ വിഹാരി, ഋഷഭ് പന്ത്, രവീന്ദ്ര ജഡേജ, ആർ. അശ്വിൻ, ജസ്പ്രീത് ബുമ്ര, ഉമേഷ് യാദവ്, മുഹമ്മദ് സിറാജ്.
