തിരുവനന്തപുരം: സംസ്ഥാനത്ത് ഡോക്ടര്മാര്ക്കെതിരായ അക്രമങ്ങള് ശ്രദ്ധയില്പ്പെട്ടിട്ടില്ലെന്ന നിയമസഭയിലെ ഉത്തരം തിരുത്തി ആരോഗ്യ മന്ത്രി വീണാ ജോര്ജ്. ഡോക്ടര്മാര്ക്ക് എതിരായ അക്രമം കൂടുന്നത് ശ്രദ്ധയില്പ്പെട്ടിട്ടുണ്ടെന്നാണ് ആരോഗ്യ മന്ത്രി തിരുത്തിയത്. സ്പീക്കറുടെ പ്രത്യേക അനുമതിയോടെ പുതുക്കിയ മറുപടി സഭയുടെ മേശപ്പുറത്ത് വെച്ചു.
ഡോക്ടര്മാര്ക്കെതിരായ അക്രമങ്ങള് തടയാനുള്ള നിര്ദ്ദേശങ്ങള് വ്യക്തമാക്കി ഉത്തരവും ഇറങ്ങി. അത്യാഹിത, ഒപി പരിസരങ്ങളില് സിസിടിവി സ്ഥാപിക്കണം, വിമുക്ത ഭടന്മാരെ സുരക്ഷാ ജീവനക്കാരായി നിയമിക്കണം, സുരക്ഷാ ജീവനക്കാരെ ഏകോപിക്കുന്നതിന് പ്രത്യേക ഉദ്യോഗസ്ഥന് ചുമതല നല്കണം എന്നിങ്ങനെയാണ് ഉത്തരവിലെ നിര്ദ്ദേശങ്ങള്.