ന്യൂഡല്ഹി: കേന്ദ്ര സര്ക്കാരിന്റെ പൗരത്വ ബില് പാര്ലമെന്റില് അവതരിപ്പിക്കാനുള്ള നീക്കത്തിനെതിരെ നഗ്നത പ്രദര്ശന പ്രതിഷേധവുമായി അസം സ്വദേശികള്. പാര്ലമെന്റിന് മുന്നിലെ റോഡില് നഗ്നരായെത്തിയായിരുന്നു പ്രതിഷേധം.
ആള് അസം സ്റ്റുഡന്സ് യൂണിയന്, നോര്ത്ത് ഈസ്റ്റ് സ്റ്റുഡന്സ് ഓര്ഗനൈസേഷന്, കൃഷക് മുക്തി സംഗ്രം സമിതി തുടങ്ങി മുപ്പതോളം സംഘടനകള് പ്രതിഷേധവുമായി രംഗത്തെത്തിയിട്ടുണ്ട്. പാര്ലമെന്റ് സ്ട്രീറ്റ് പൊലീസ് പ്രതിഷേധക്കാരെ അറസ്റ്റ് ചെയ്ത് നീക്കി.
ദേശീയ പൗരത്വ രജിസ്റ്റര് ബില് പാസാക്കാനുള്ള മോദി സര്ക്കാരിന്റെ നീക്കത്തിന് എതിരെ അസമില് ഇന്ന് ‘ബ്ലാക്ക് ഡേ’ ആയി ആചരിക്കുകയാണ്. 3.29 കോടി വരുന്ന ആസാമിലെ ജനസംഖ്യയില് 40.07 ലക്ഷം പേരെ ഉള്പ്പെടാതെയായിരുന്നു കഴിഞ്ഞ സെപ്റ്റബര് 25 ന് ദേശീയ പൗരത്വ രജിസ്റ്റര് പ്രസിദ്ധീകരിച്ചത്. അസമില് പൗരത്വ രജിസ്റ്റര് പ്രക്രിയ പൂര്ത്തിയാകുമ്പോള് ചുരുങ്ങിയത് 10 ലക്ഷം പേര് ഇന്ത്യന് പൗരന്മാര് അല്ലാതായേക്കും.