ദോഹ: ഏഷ്യന്‍ അത്‌ലറ്റിക് ചാമ്പ്യന്‍ഷിപ്പില്‍ മലയാളി താരം പി.യു. ചിത്രയ്ക്ക് സ്വര്‍ണം. വനിതകളുടെ 1500 മീറ്റര്‍ ഓട്ടത്തിലാണ് ചിത്ര സ്വര്‍ണം സ്വന്തമാക്കിയത്. 4.14.56 സെക്കന്‍ഡിലായിരുന്നു ഫിനിഷ്. കഴിഞ്ഞ ഏഷ്യന്‍ അത്‌ലറ്റിക് ചാമ്പ്യന്‍ഷിപ്പിലും ഈയിനത്തില്‍ ചിത്ര സ്വര്‍ണം നേടിയിരുന്നു. ഇന്ത്യയുടെ മൂന്നാം സ്വര്‍ണമാണിത്.
ഏഷ്യന്‍ അത്ലറ്റിക്‌സ് ചാമ്പ്യന്‍ഷിപ്പില്‍ ഇന്നലെ ഹെപ്റ്റാത്ത്‌ലണില്‍ സ്വപ്ന ബര്‍മ്മനും മലയാളികളായ മുഹമ്മദ് അനസ്, വി.കെ വിസ്മയ എന്നിവരടങ്ങിയ മിക്‌സഡ് റിലേ ടീമുമാണ് വെള്ളിമെഡലുകള്‍ നേടിയത്. എം.ആര്‍ പൂവമ്മ, ആരോഗ്യരാജീവ് എന്നിവരായിരുന്നു മിക്‌സഡ് റിലേയിലെ മറ്റംഗങ്ങള്‍. ഹെപ്റ്റാത്ത്‌ലണില്‍ സീസണ്‍ ബെസ്റ്റായ 5993 പോയിന്റാണ് സ്വപ്ന നേടിയത്. 2000 മീറ്റര്‍ സ്റ്റീപ്പിള്‍ ചേസില്‍ പരുള്‍ ചൗധരി അഞ്ചാമതായി. പോയിന്‍റ് നിലയില്‍ ഇന്ത്യ ഇപ്പോള്‍ മൂന്നാം സ്ഥാനത്തുമാണ്.
