ആന്റണി വര്ഗീസിനെ നായകനാക്കി വീക്കെന്ഡ് ബ്ലോക്ക്ബസ്റ്റേഴ്സിന്റെ ബാനറില് സോഫിയാ പോള് നിര്മ്മിക്കുന്ന പുതിയ ചിത്രത്തിന്റെ ചിത്രീകരണം പുരോഗമിക്കുകയാണ്. നീണ്ടു നില്ക്കുന്ന കടല് സംഘര്ഷത്തിന്റെ കഥ പറയുന്ന ചിത്രം നവാഗതനായ അജിത് മാമ്പള്ളിയാണ് സംവിധാനം ചെയ്യുന്നത്. ആര്.ഡി.എക്സിന്റ വന് വിജയത്തിനു ശേഷം വീക്കെന്ഡ് ബ്ലോക്ക്ബസ്റ്റേഴ്സ് നിര്മിക്കുന്ന ചിത്രം ഈ കമ്പനിയുടെ ഏഴാമത് സംരഭം കൂടിയാണ്.
ചിത്രത്തിനായി 100 അടി വലിപ്പമുള്ള ബോട്ടിന്റെ ഒരു വമ്പന് സെറ്റ് ഇപ്പോള് ഒരുങ്ങിയിരിക്കുകയാണ്. ഓണം റിലീസായി എത്തുന്ന ചിത്രം തീയറ്ററുകളില് എത്തും. ഷബീര് കല്ലറയ്ക്കല്, രാജ് ബി ഷെട്ടി തുടങ്ങിയവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. പെപ്പെയുടെ കരിയറിലെ തന്നെ ഏറ്റവും വലിയ ബജറ്റില് ഒരുങ്ങുന്ന സോളോ ചിത്രം കൂടിയാണിത്. ഓണം റിലീസായി ചിത്രം തീയറ്ററുകളില് എത്തുമെന്നാണ് പ്രതീക്ഷിക്കുന്നത്. ചിത്രത്തിന്റെ പേര് ഉടനെ പ്രഖ്യാപിക്കും.
കടലിന്റെ പശ്ചാത്തലത്തില് പൂര്ണ്ണമായും ഒരു റിവഞ്ച് ആക്ഷന് ഡ്രാമയാണ് ഈ ചിത്രത്തിലൂടെ പ്രേക്ഷകരിലേക്ക് എത്തുന്നത്. ഒരു തീരപ്രദേശത്തിന്റെ സംസ്ക്കാരവും ജീവിതവും തികച്ചും റിയലിസ്റ്റിക്കായി ഈ ചിത്രത്തിലൂടെ അവതരിപ്പിക്കുകയാണ്. കടലിന്റെ പശ്ചാത്തലത്തിലൂടെ പല ചിത്രങ്ങളും വന്നിട്ടുണ്ടങ്കിലും ഇത്തരമൊരു പ്രതികാര കഥ ഇതാദ്യമാണ്. ഉള്ളില് കത്തുന്ന കനലുമായി തന്റെ ജീവിത ലക്ഷ്യത്തിനായി ഇറങ്ങിത്തിരിക്കുന്ന ഒരു കടലിന്റെ പുത്രന്റെ ജീവിതമാണ് തികച്ചും സംഘര്ഷഭരിതമായ രംഗങ്ങളിലൂടെ അവതരിപ്പിക്കുന്നത്. പ്രേക്ഷകരെ ആവേശത്തിലാഴ്ത്തുവാന് തക്ക വിധമാണ് അവതരണം. എഴുപതോളം ദിവസങ്ങള് നീണ്ടു നില്ക്കുന്ന ചിത്രീകരണത്തില് ഏറെയും കടലിലെ തകര്പ്പന് റിവഞ്ച് ആക്ഷന് രംഗങ്ങളാണ് ചിത്രീകരിക്കുന്നത്. കെ ജി എഫ് ചാപ്റ്റര് 1, കാന്താര തുടങ്ങിയ ചിത്രങ്ങള്ക്ക് സംഘട്ടനം ഒരുക്കിയ വിക്രം മോറാണ് ഈ ചിത്രത്തിന്റെ ആക്ഷന് രംഗങ്ങള്ക്ക് പിന്നിലും പ്രവര്ത്തിക്കുന്നത്- അണിയറ പ്രവര്ത്തകര് പറയുന്നു.
പുതുമുഖം പ്രതിഭയാണ് നായിക. ഗൗതമി നായര് മറ്റൊരു പ്രധാന കഥാപാത്രത്തെ അവതരിപ്പിക്കുന്നു. ശരത് സഭ, നന്ദു, സിറാജ് (ആര്.ഡി.എക്സ് ഫെയിം), ജയക്കുറുപ്പ്, ആഭാ.എം. റാഫേല്, ഫൗസിയ മറിയം ആന്റണി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. റോയ്ലിന് റോബര്ട്ട്, സതീഷ് തോന്നക്കല്, അജിത് മാമ്പള്ളി എന്നിവരാണ് തിരക്കഥ രചിച്ചിരിക്കുന്നത്. സാം സി.എസ്സിന്റേതാണു സംഗീതം. ഗാനരചന – വിനായക് ശശികുമാര്, ഛായാഗ്രഹണം – ദീപക് ഡി മേനോന്, ജിതിന് സ്റ്റാന്സിലോസ്, എഡിറ്റിംഗ് – ശ്രീജിത് സാരംഗ്, കലാസംവിധാനം – വിനോദ് രവീന്ദ്രന്, മനു ജഗദ്, മേക്കപ്പ് – അമല് ചന്ദ്ര, കോസ്റ്റ്യൂം ഡിസൈന് – നിസ്സാര് റഹ്മത്ത്, ചീഫ് അസ്സോസ്സിയേറ്റ് ഡയറക്ടര് – ഉമേഷ് രാധാകൃഷ്ണന്, ഫിനാന്സ് കണ്ട്രോളര് – സൈബന് സി സൈമണ് (വീക്കെന്ഡ് ബ്ലോക്ക്ബസ്റ്റേഴ്സ്). റോജി പി കുര്യന്, പ്രൊഡക്ഷന് മാനേജര് – പക്കു കരീത്തറ, പ്രൊഡക്ഷന് എക്സിക്യൂട്ടീവ് – സനൂപ് മുഹമ്മദ്, പ്രൊഡക്ഷന് കണ്ട്രോളര് – ജാവേദ് ചെമ്പ്, പി ആര് ഒ – ശബരി, ഡിജിറ്റല് മാര്ക്കറ്റിംഗ് – അനൂപ് സുന്ദരന്. രാമേശ്വരം, അഞ്ചുതെങ്ങ്, കഠിനംകുളം, വര്ക്കല, കൊല്ലം എന്നിവിടങ്ങളിലായിട്ടാണ് ചിത്രത്തിന്റെ ഷൂട്ടിംഗ് നടക്കുക. വീക്കെന്ഡ് ബ്ലോക്ക്ബസ്റ്റേഴ്സ് തന്നെയാണ് ചിത്രം തീയറ്ററുകളില് പ്രദര്ശനത്തിന് എത്തിക്കുന്നത്.