ന്യൂഡല്‍ഹി: കോണ്‍ഗ്രസ് മുസ്ലിം പാര്‍ട്ടിയാണെന്ന പ്രധാനമന്ത്രി നരേന്ദ്ര മോദിയുടെ പ്രസ്താവനയ്ക്കെതിരേ ആഞ്ഞടിച്ച്‌ കോണ്‍ഗ്രസ് നേതൃത്വം. രാഹുല്‍ ഗാന്ധിയോടുള്ള പക കാരണം മോദിക്കു കണ്ണുകാണാതായെന്നും മോദിയുടെ രോഗം പിടിച്ച മാനസികാവസ്ഥ രാജ്യത്തിന് ആശങ്കയുണ്ടാക്കുന്നതാണെന്നും കോണ്‍ഗ്രസ് നേതാക്കള്‍ കുറ്റപ്പെടുത്തി. വസ്തുതയും ചരിത്രവും മറന്നാണ് പ്രധാനമന്ത്രി പ്രസ്താവന നടത്തുന്നതെന്നും ആനന്ദ് ശര്‍മ പറഞ്ഞു.
ചരിത്രങ്ങള്‍ മറന്ന് സ്വന്തം ചരിത്രമുണ്ടാക്കാനുള്ള ശ്രമമാണ് മോദി നടത്തുന്നതെന്ന് ആനന്ദ് ശര്‍മ കുറ്റപ്പെടുത്തി. മഹാത്മാ ഗാന്ധി, ജവഹര്‍ലാല്‍ നെഹ്റു, സര്‍ദാര്‍ പട്ടേല്‍ തുടങ്ങിയവര്‍ നേതൃത്വം നല്‍കിയ പാര്‍ട്ടിയെ കുറിച്ചാണ് വസ്തുതകള്‍ മറച്ചുവെച്ച്‌ പ്രസ്താവന നടത്തിയതെന്നും അദ്ദേഹം പറഞ്ഞു.
രാഹുല്‍ ഗാന്ധിയുടെയും മുന്‍ പ്രധാനമന്ത്രി മന്‍മോഹന്‍ സിംഗിന്‍റെയും പേരില്‍ മോദിയും ബിജെപിയും നുണകള്‍ പ്രചരിപ്പിക്കുകയാണെന്ന് കോണ്‍ഗ്രസ് മാധ്യമ വിഭാഗം മേധാവി രണ്‍ദീപ് സിംഗ് സുര്‍ജെവാല പറഞ്ഞു. വരുന്ന പൊതു തെരഞ്ഞെടുപ്പില്‍ ബിജെപിയുടെ തോല്‍വി മോദി മുന്‍കൂട്ടി മനസിലാക്കിയിട്ടുണ്ട്. അതുകൊണ്ട് സമൂഹത്തില്‍ ധ്രുവീകരണമുണ്ടാക്കാനാണ് മോദിയും കൂട്ടരും നടത്തുന്നതെന്നും അദ്ദേഹം ആരോപിച്ചു.
ഉത്തര്‍പ്രദേശിലെ അസംഗഡില്‍ നടത്തിയ പരിപാടിക്കിടെയായിരുന്നു പ്രധാനമന്ത്രി നരേന്ദ്ര മോദി കോണ്‍ഗ്രസ് മുസ്ലീം പാര്‍ട്ടിയാണെന്ന് ആരോപിച്ചത്.
