തിരുവനന്തപുരം: ടോക്യോ ഒളിമ്പിക്‌സിന് യോഗ്യത നേടിയ മലയാളി കായികതാരങ്ങള്‍ക്ക് 5 ലക്ഷം രൂപ വീതം സംസ്ഥാന ഗവണ്‍മെന്റ് അനുവദിച്ചു. ഒളിമ്പിക്‌സ് യോഗ്യത നേടിയ 10 പേര്‍ക്കും പാരാലിമ്പിക്‌സിന് യോഗ്യത നേടിയ സിദ്ധാര്‍ത്ഥ ബാബുവിനുമായി ആകെ 55 ലക്ഷം രൂപയാണ് അനുവദിച്ചത്. പരിശീലനത്തിനും അനുബന്ധ സൗകര്യങ്ങള്‍ക്കുമായാണിതെന്ന് മുഖ്യമന്ത്രി പത്രസമ്മേളനത്തില്‍ അറിയിച്ചു.
കെ ടി ഇര്‍ഫാന്‍, മുഹമ്മദ് അനസ്, വി കെ വിസ്മയ, ജിസ്‌ന മാത്യു, നേഹ നിര്‍മ്മല്‍ ടോം, എം ശ്രീശങ്കര്‍, പി ആര്‍ ശ്രീജേഷ്, പി യു ചിത്ര, എം പി ജാബിര്‍, യു കാര്‍ത്തിക് എന്നിവര്‍രാണ് തുക ലഭിക്കുക. ജൂലൈ 23 നാണ് 2021 ഒളിമ്പിക്‌സിന് തുടക്കംകുറിക്കുക. അടുത്ത ദിവസങ്ങളില്‍ പട്യാലയില്‍ നടക്കുന്ന നാഷണല്‍ സീനിയര്‍ മീറ്റില്‍ പങ്കെടുക്കുന്ന താരങ്ങള്‍ക്ക് ഒളിമ്പിക്‌സ് യോഗ്യതയ്ക്ക് അവസരമുണ്ട്. 43 മലയാളിതാരങ്ങള്‍ നാഷണല്‍ മീറ്റില്‍ പങ്കെടുക്കുന്നുണ്ട്.
