ഇന്ത്യയിൽ ഗാലക്സി ടാബ് എ7 പുറത്തിറക്കി സാംസങ്ങ്. സാംസങ്ങിന്റെ ഏറ്റവും പുതിയ മിഡ്റേഞ്ച് ടാബ്ലറ്റാണ് ഗാലക്സി ടാബ് എ7. പുതിയ ഗാലക്സി എ42 5ജി സ്മാർട്ട്ഫോൺ, ഗാലക്സി ഫിറ്റ് 2 സ്മാർട്ട്ബാൻറ്, 4കെ പ്രൊജക്ടർ എന്നിവക്കൊപ്പം കഴിഞ്ഞ ദിവസം നടത്തിയ വെർച്വൽ ഇവൻറിലാണ് ഗാലക്സി ടാബ് എ7 അവതരിപ്പിച്ചത്.
മെറ്റാലിക് ഫിനിഷിൽ 80 ശതമാനം സ്ക്രീൻ ടു ബോഡി റേഷ്യോയോട് കൂടിയാണ് ടാബ് എ7 എത്തുന്നത്.
10.4 ഇഞ്ചുള്ള WUXGA+ (2,000 x 1,200) സ്ക്രീൻ കാഴ്ചാനുഭവവും ഡോൾബി അറ്റ്മോസോടുകൂടിയ നാല് സ്പീക്കർ മികച്ച ശബ്ദാനുഭവവും നൽകും. ക്വാൽകോം സ്നാപ്ഡ്രാഗന്റെ 662 എന്ന മിഡ്റേഞ്ച് പ്രൊസസറാണ് ടാബ് എ7ന്. 3 ജിബി റാമും 32 ജിബി സ്റ്റോറേജും ഒരു ടിബി വരെയുള്ള മൈക്രോ എസ്ഡി കാർഡ് സപ്പോർട്ടും നൽകിയിട്ടുണ്ട്. എട്ട് മെഗാ പിക്സൽ പിൻ കാമറയും 5 മെഗാ പിക്സൽ മുൻ കാമറയും 7,040mAh ഉള്ള വലിയ ബാറ്ററിയുമാണ് മറ്റു പ്രത്യേകതകൾ.
വൈഫൈ മാത്രമുള്ള ഗാലക്സി ടാബ് എ7 മോഡലിന്റെ പ്രാരംഭ വില 17,999 രൂപയാണ്. എൽ.ടി.ഇ മോഡലിന് 21,999 രൂപയും നൽകേണ്ടി വരും.