വലിയ ലോഞ്ച് പ്രഖ്യാപനമില്ലാതെ തന്നെ ഇന്ത്യയിലെ തങ്ങളുടെ ആദ്യ ടെലിവിഷൻ ശ്രേണി അവതരിപ്പിച്ചിരിക്കുകയാണ് ഇ കോമേഴ്‌സ് കമ്പനിയായ ആമസോൺ. 50-ഉം 55 ഇഞ്ചും വലിപ്പമുള്ള രണ്ട് ടെലിവിഷനുകളാണ് ആമസോൺ ബേസിക്സ് ശ്രേണിയ്ക്ക് കീഴിൽ അവതരിപ്പിച്ചിരിക്കുന്നത്. 50-ഇഞ്ച് ടിവിയ്ക്ക് 29,999 രൂപയും 55-ഇഞ്ച് സ്മാർട്ട് ടിവിയ്ക്ക് 34,999 രൂപയുമാണ് വില. 4K എച്ഡിആർ എൽഇഡി ഡിസ്പ്ലേ പാനലുകളുമായി വിപണിയിലെത്തിയിരിക്കുന്ന ആമസോൺബേസിക്സ് ഫയർ ടിവി, ഡോൾബി വിഷൻ, ഡോൾബി അറ്റ്മോസ് ഫോർമാറ്റുകൾ പിന്തുണയ്ക്കും വിധമാണ് തയ്യാറാക്കിയിരിക്കുന്നത്. ആമസോൺ ഇന്ത്യ വെബ്‌സൈറ്റ് വഴി പുത്തൻ ടിവികളുടെ വില്പന ആരംഭിച്ചു കഴിഞ്ഞു.
ഷവോമി, ടിസിഎൽ, ഹൈസെൻസ്, വ്യൂ തുടങ്ങിയ ബ്രാൻഡുകളുടെ എൻട്രി ലെവൽ 4K സ്മാർട്ട് ടിവികളുമായാണ് ആമസോൺബേസിക്സ് ഫയർ ടിവി എഡിഷൻ മത്സരിക്കുന്നത്. ഈ രണ്ട് ടിവികൾക്കും അൾട്രാ എച്ച്ഡി (3840×2160 പിക്‌സൽ) എൽഇഡി സ്‌ക്രീനുകളാണ്. ഡോൾബി വിഷൻ പിന്തുണയും എച്ച്ഡിആർ പിന്തുണയുമുള്ള ഈ സ്‌ക്രീനുകൾക്ക് 60hz റിഫ്രഷ് റേറ്റും 178 ഡിഗ്രി വ്യൂവിങ് ആംഗിളുമുണ്ട്. ഡോൾബി അറ്റ്മോസ് സപ്പോർട്ടുള്ള 20 W സ്പീക്കർ ആണ് ആമസോൺബേസിക്സ് ഫയർ ടിവി എഡിഷന്റെ മറ്റൊരു പ്രത്യേകത. 1.9 GHz ക്വാഡ് കോർ അംലോജിക് ഒൻപതാം തലമുറ ഇമേജിംഗ് എഞ്ചിനാണ് ആമസോൺബേസിക്സ് ഫയർ ടിവികൾക്ക് കരുത്ത് പകരുന്നത്. സെറ്റ്-ടോപ്പ് ബോക്സ്, ബ്ലൂ റേ പ്ലെയറുകൾ, ഗെയിമിംഗ് കൺസോളുകൾ എന്നിവ ബന്ധിപ്പിക്കാൻ യുഎസ്ബി 3.0, ഹാർഡ് ഡ്രൈവുകളെയും മറ്റ് യുഎസ്ബി ഉപകരണങ്ങളെയും ബന്ധിപ്പിക്കുന്നതിന് ഒരു യുഎസ്ബി 2.0 പോർട്ട്, മൂന്ന് എച്ച്ഡിഎംഐ 2.0 പോർട്ടുകൾ എന്നിവ ടിവിയിലുണ്ട്.
സൗണ്ട്ബാറുകൾ, റിസീവറുകൾ എന്നിവയ്ക്കായ് ഒരു ഐആർ പോർട്ടും ഉൾപെടുത്തിയിട്ടുണ്ട്. ആമസോൺബേസിക്സ് ഫയർ ടിവി ആമസോണിന്റെ ഫയർ ടിവി ഓപ്പറേറ്റിംഗ് സിസ്റ്റം അടിസ്ഥാനമായാണ് പ്രവർത്തിക്കുന്നത്. ഫയർ ടിവി സ്റ്റിക് ഉപയോഗിച്ച് പ്രവർത്തിക്കുന്ന ഉപകരണങ്ങൾക്കും ഫയർ ടിവി സ്റ്റിക് അടിസ്ഥാനമായ ഒനിഡാ, അക്കായ് ടിവികളുടെയും ഓപ്പറേറ്റിംഗ് സിസ്റ്റം ഇത് തന്നെയാണ്. അതെ സമയം ഒരു സെറ്റ് ടോപ് സ്ഥാപിച്ച് മറ്റുള്ള സ്റ്റീമിലുള്ള പരിപാടികളും ആമസോൺബേസിക്സ് ഫയർ ടിവി എഡിഷനിൽ സുഗമമായി കാണാം. ആമസോണിന്റെ സ്വന്തം ഓടിടി പ്ലാറ്റ്‌ഫോം ആയ പ്രൈം വീഡിയോ മാത്രമല്ല മറ്റുള്ള ഓടിടികളായ നെറ്റ്ഫ്ലിക്ക്സ്, ഹോട്ട്സ്റ്റാർ, യൂട്യൂബ് എന്നിവ ആപ്പ് ഉപയോഗിച്ച് ആമസോൺബേസിക്സ് ഫയർ ടിവിയിൽ കാണാം.
