എറണാകുളം: ഗാര്ഹിക പീഡനത്തെ തുടര്ന്ന് ആലുവയില് ആത്മഹത്യ ചെയ്ത മോഫിയ പര്വീനോട് മോശമായി പെരുമാറിയ ആലുവ സി ഐ സുധീര് മുന്പും വിവാദങ്ങളില് പെട്ടിട്ടുള്ള ഉദ്യോഗസ്ഥന്. കേരളം ചര്ച്ച ചെയ്ത ഉത്ര കേസ് അടക്കം മുന് രണ്ട് തവണ ജോലിയില് വീഴ്ച വരുത്തിയിട്ടുള്ള ഇയാള്ക്കെതിരെ ആഭ്യന്തര അന്വേഷണവും വകുപ്പ് തല നടപടികളും ഉണ്ടായിട്ടുണ്ട്.
കൊല്ലത്തെ പ്രമാദമായ ഉത്ര കൊലക്കേസിന്റെ അന്വേഷണ ഉദ്യോഗസ്ഥനായിരുന്നു സുധീര്. ഭര്ത്താവ് സൂരജ് പാമ്പിനെ കൊണ്ട് ഉത്രയെ കടിപ്പിച്ച് കൊന്നുവെന്ന കേസിന്റെ അന്വേഷണ ഘട്ടത്തില് ഇയാള് വീഴ്ച വരുത്തി. ആരോപണം ഉയര്ന്നതോടെയാണ് ഇയാളെ ആലുവയിലേക്ക് സ്ഥലം മാറ്റിയത്. ഉത്ര കേസിലെ സുധീറിന്റെ അന്വേഷണ വീഴ്ചയെ കുറിച്ച് ഉള്ള പൊലീസിന്റെ ആഭ്യന്തര അന്വേഷണം ഈ മാസം 19 നാണ് പൂര്ത്തിയായത്.
ഇതിന് മുമ്പ് അഞ്ചല് ഇടമുളയ്ക്കലില് മരിച്ച ദമ്പതിമാരുടെ ഇന്ക്വസ്റ്റ് റിപ്പോര്ട്ട് ഒപ്പിടാന് സ്വന്തം വീട്ടിലേക്ക് മൃതദ്ദേഹം എത്തിച്ച വിവാദത്തിലും സുധീറിനെതിരെ ആഭ്യന്തര അന്വേഷണം നടന്നിട്ടുണ്ട്. 2020 ജൂണിലായിരുന്നു ഈ കേസ്. അന്ന് അഞ്ചല് സിഐ യായിരുന്നു സുധീര്. അന്നത്തെ കൊല്ലം റൂറല് എസ്പിയായിരുന്ന ഹരിശങ്കര് സംസ്ഥാന പൊലീസ് മേധാവിക്ക് റിപ്പോര്ട്ട് നല്കി. ഗുരുതര കൃത്യവിലോപം നടത്തിയെന്നും അച്ചടക്ക നടപടി വേണം എന്നുമായിരുന്നു ശുപാര്ശ.
അതേസമയം, മോഫിയ പര്വീന്റെ മൃതദേഹം വസതിയിലെത്തിച്ചു. കളമശ്ശേരി മെഡിക്കല് കോളജിലെ പോസ്റ്റ്മാര്ട്ടം നടപടികള്ക്ക് ശേഷമാണ് അല്പസമയം മുന്പ് മൃതദേഹം വീട്ടിലെത്തിച്ചത്. ആത്മഹത്യാ കുറിപ്പെഴുതി വച്ചിട്ടാണ് മോഫിയ ജീവനൊടുക്കിയത്. ആത്മഹത്യാ കുറിപ്പില് ആലുവ സിഐക്കെതിരെ ഗുരുതര ആരോപണങ്ങളാണ് ഉണ്ടായിരുന്നത്. ഇത് പൊലീസിന് പ്രതിസന്ധി ആയിട്ടുണ്ട്.
ഇന്ന് രാവിലെയാണ് എടയപ്പുറം സ്വദേശി മോഫിയ പര്വിന് (21)നെ തൂങ്ങി മരിച്ച നിലയില് കണ്ടെത്തിയത്. ഭര്തൃവീട്ടുകാര്ക്കെതിരെ പൊലീസില് പരാതി നല്കിയതിന് പിന്നാലെയാണ് യുവതി തൂങ്ങി മരിച്ചത്. 8 മാസങ്ങള്ക്ക് മുന്പാണ് മോഫിയ പര്വീന്റെയും മുഹ്സിന്റെയും വിവാഹം കഴിഞ്ഞത്. ഫേസ്ബുക്കിലെ പരിചയം പ്രണയമാവുകയായിരുന്നു. വിവാഹത്തിനു പിന്നാലെ ഇരുവരും തമ്മില് പ്രശ്നങ്ങളുണ്ടാവുകയും പെണ്കുട്ടി സ്വന്തം വീട്ടിലേക്ക് മാറി താമസിക്കുകയും ചെയ്തു.
തുടര്ന്ന് ആലുവ ഡിവൈഎസ്പിക്ക് പെണ്കുട്ടിയുടെ കുടുംബം പരാതി നല്കി. ഇന്നലെ പെണ്കുട്ടിയുടെയും ഭര്ത്താവിന്റെയും വീട്ടുകാരെ മധ്യസ്ഥ ചര്ച്ചയ്ക്ക് വിളിച്ചിരുന്നു. എന്നാല് സിഐ വളരെ മോശമായാണ് സംസാരിച്ചതെന്ന് ബന്ധുക്കള് ആരോപിച്ചു. കൃത്യമായ അന്വേഷണം ഉണ്ടായില്ലെങ്കില് ആക്ഷന് കൗണ്സില് രൂപീകരിച്ച് പ്രതിഷേധിക്കും എന്നും പെണ്കുട്ടിയുടെ അമ്മാവന് പറഞ്ഞു.