വാനിറ്റി വാനിനു പിന്നാലെ റേഞ്ച് റോവറും സ്വന്തമാക്കി സൂപ്പര്‍ താരം അല്ലു അര്‍ജുന്‍. ഇന്‍സ്റ്റഗ്രാമിലൂടെയാണ് തന്റെ പുതിയ റേഞ്ച് റോവറിന്റെ ചിത്രം താരം ആരാധകരുമായി പങ്കു വച്ചത്. ബീസ്റ്റ് എന്നാണ് വാഹനത്തിന് അല്ലു അര്‍ജുന്‍ നല്‍കിയിരിക്കുന്ന പേര്. ഏകദേശം രണ്ടു കോടിയോളം രൂപയാണ് റേഞ്ച് റോവറിന്റെ വില.
ദിവസങ്ങള്‍ക്കു മുന്‍പ് പൃഥ്വിരാജും റേഞ്ച് റോവര്‍ സ്വന്തമാക്കിയിരുന്നു. വാഹനത്തിന്റെ ഫാന്‍സി നമ്പറിനായി ലേലത്തിനായി പേരു നല്‍കിയിരുന്നെങ്കിലും പ്രളയ ദുരിതാശ്വാസത്തിലേക്ക് ആ തുക നല്‍കി പൃഥ്വി കയ്യടി നേടിയുന്നു. കൊച്ചിയിലെ ഡീലര്‍ഷിപ്പില്‍ നിന്നായിരുന്നു താരം റേഞ്ച് റോവര്‍സ്വന്തമാക്കിയത്.
ലാന്‍ഡ് റോവറിന്റെ ഏറ്റവും മികച്ച എസ്.യു.വികളിലൊന്നാണ് റേഞ്ച് റോവര്‍. ആഡംബരവും സുരക്ഷയും ഒരുപോലെ ഒത്തു ചേര്‍ന്ന വാഹനം ബോളിവുഡ് താരങ്ങളുടേയെല്ലാം ഇഷ്ട വാഹനമാണ്. സഞ്ജയ് ദത്ത്, ആലിയ ബട്ട്, കത്രീന കൈഫ്, ശില്‍പ്പ ഷെട്ടി തുടങ്ങി നിരവധി താരങ്ങളുടേത് റേഞ്ച് റോവറാണ്. വോഗ്, വോഗ് എസ്.ഇ, ഓട്ടോബയോഗ്രാഫി തുടങ്ങി വിവിധ മോഡലുകളില്‍ ഈ ആഡംബര എസ്.യു.വി വില്‍പ്പനയിലുണ്ട്.
പൂര്‍ണമായും ഇറക്കുമതി ചെയ്യുന്ന റേഞ്ച് റോവറിന് ഏകദേശം 2 കോടി രൂപ മുതലാണ് വില. 3.0 ലീറ്റര്‍ പെട്രോള്‍, 3.0 ലീറ്റര്‍ ഡീസല്‍, 4.4 ലീറ്റര്‍ എസ്.ഡി.വി- 8 ഡീസല്‍. 5.0 ലീറ്റര്‍ പെട്രോള്‍ എന്‍ജിനുകളാണ് വിപണിയിലുള്ളത്. 3 ലിറ്റര്‍ എന്ജിന് 4000 ആര്‍.പി.എമ്മില്‍ 244 ബി.എച്ച്.പി കരുത്തും 2,000 ആര്‍.പി.എമ്മില്‍ 600 എന്‍.എം ടോര്‍ക്കും ഉല്‍പാദിപ്പിക്കും. 210 കിലോമീറ്ററാണ് പരമാവധി വേഗത. 4.4 ലിറ്റര്‍ എന്‍ജിന്റെ പരമാവധി കരുത്ത് 335 ബി.എച്ച്.പിയും ടോര്‍ക്ക് 740 എന്‍.എമ്മുമാണ്. ഇതിന്റെ പരമാവധി വേഗത 218 കിലോമീറ്ററാണ്. 5 ലിറ്റര്‍ പെട്രോള്‍ എന്ജിന് 503 ബി.എച്ച്.പി കരുത്തും 625 എന്‍.എം ടോര്‍ക്കുമുണ്ട്. 225 കിലോമീറ്ററാണ് പരമാവധി വേഗത.
