ന്യൂഡല്ഹി: ചൈനയിലെ വുഹാനില് കുടുങ്ങി കിടക്കുന്ന ഇന്ത്യക്കാരെ ഒഴിപ്പിക്കാനുള്ള നടപടികളുമായി ഇന്ത്യ. കൊറോണ വൈറസ് ബാധയെ തുടര്ന്നാണ് നടപടി. ചൈനയില് കുടങ്ങിക്കിടക്കുന്നവരെ രക്ഷപെടുത്താനുള്ള എയര് ഇന്ത്യ വിമാനം മുംബൈ വിമാനത്താവളത്തില് നിന്നും വുഹാനിലേയ്ക്ക് പുറപ്പെടും.
വിമാനത്തിന് ഇറങ്ങാനുള്ള അനുമതി ചൈന നല്കി. കേന്ദ്ര സര്ക്കാര് നടത്തിയനീക്കത്തെ തുടര്ന്നാണ് ചൈന അനുമതി നല്കിയത്. നേരത്തെ കാബിനറ്റ് സെക്രട്ടറി രാജീവ് ഗൗബയുടെ അധ്യക്ഷതയില് ഡല്ഹിയില് ചേര്ന്ന ഉന്നതതല യോഗം ചൈനയില് നിന്ന് ഇന്ത്യക്കാരെ ഒഴിപ്പിക്കാനുള്ള നടപടി സംബന്ധിച്ച നിര്ദ്ദേശം കേന്ദ്ര വിദേശകാര്യ മന്ത്രാലയത്തിനും വ്യോമയാന മന്ത്രാലയത്തിനും നല്കിയിരുന്നു.
പാസ്പോര്ട്ട് കൈവശമില്ലാത്തവര് അടിയന്തരമായി ബന്ധപ്പെടണമെന്ന് ബെയ്ജിങ്ങിലെ ഇന്ത്യന് സ്ഥാനപതികാര്യാലയം നിര്ദ്ദേശിച്ചിട്ടുണ്ട്. വിസയോ വര്ക്ക് പെര്മിറ്റോ പുതുക്കുന്നതിനുവേണ്ടി പാസ്പോര്ട്ട് ചൈനീസ് അധികൃതര്ക്ക് നല്കിയിട്ടുള്ളവരാണ് വിവരങ്ങള് കൈമാറേണ്ടത്.പാസ്പോര്ട്ട് കൈവശം ഇല്ലാത്തവര്ക്ക് വിവരങ്ങള് അറിയിക്കാന് പ്രത്യേക ഇ മെയില് ഐ.ഡിയും അധികൃതര് തയ്യാറാക്കിയിട്ടുണ്ട്.