പറവൂര്‍: ദുരിതാശ്വാസത്തിന് കൊടുക്കാന്‍ വച്ച പച്ചക്കറിയും അരിയും കഴിച്ചാണ് താന്‍ അടക്കം 45 പേര്‍ ജീവിച്ചതെന്ന് നടന്‍ സലീം കുമാര്‍.
സമീപ പ്രദേശത്തെ ദുരിതാശ്വാസ ക്യാംപില്‍ എത്തിക്കാന്‍ കരുതിവച്ചതായിരുന്നു അരിയും പച്ചക്കറിയും. ഇത് പിന്നീട് താനടക്കം 45 പേര്‍ക്ക് ഉപകാരപ്പെടുകയായിരുന്നു.
വെള്ളം പൊങ്ങിയപ്പോള്‍ വീട് വിട്ടിറങ്ങാനിറങ്ങിയ സലീം കുമാറിന്റെ വീട്ടില്‍ സമീപവാസികള്‍ എത്തിയതോടെയാണ് അദ്ദേഹം യാത്ര അവസാനിപ്പിച്ചത്.
വെള്ളം വീടിനെ വളഞ്ഞപ്പോള്‍ പല ആളുകളെയും വിളിച്ച് സഹായം അഭ്യര്‍ത്ഥിച്ചു. ഒരു സേനയും എത്തിയില്ലന്നും സലീം കുമാര്‍ പറഞ്ഞു.
എല്ലാവരും ഇപ്പോള്‍ എത്തുമെന്ന് പറഞ്ഞ് പറ്റിച്ചു. നാല് ദിവസം കാത്തിരുന്നു, ഒടുവില്‍ രക്ഷക്ക് എത്തിയത് മത്സ്യതൊഴിലാളികള്‍ മാത്രമാണ്. സലീം കുമാര്‍ വ്യക്തമാക്കി.
താനടക്കം ദുരിതത്തില്‍ കുടുങ്ങിയ വാര്‍ത്ത പുറത്ത് വിട്ട മാധ്യമങ്ങളെയും അദ്ദേഹം അഭിനന്ദിച്ചു.
ഇതിനിടെ പറവൂരില്‍ ദുരിതാശ്വാസ ക്യാമ്പ് പ്രവര്‍ത്തിച്ചിരുന്നതിന്റെ സമീപത്തെ പള്ളിയുടെ മതിലിടിഞ്ഞ് വീണ് ആറുപേര്‍ മരിച്ചു. കഴിഞ്ഞ ദിവസം രാത്രിയാണ് നോര്‍ത്ത് കുത്തിയതോടുള്ള പള്ളിക്ക് സമീപം അപകടം നടന്നത്. എന്നാല്‍ ഇന്നാണ് അപകടവിവരം പുറംലോകം അറിയുന്നത്. വെള്ളം കുത്തിയൊലിച്ചെത്തിയാണ് മതില്‍ തകര്‍ന്നതെന്നാണ് വിവരം.
