തിരുവനന്തപുരം: സിപിഎം രണ്ടു വോട്ടിന് വേണ്ടി ഏത് വര്ഗീയ പ്രചരണവും നടത്താന് മടിയില്ലെന്ന് തെളിയിക്കുന്ന വാക്കുകളാണ് എം.വിജയരാഘവനില് നിന്ന് ഇപ്പോള് പുറത്തുവരുന്നതെന്ന് പ്രതിപക്ഷ നേതാവ് രമേശ് ചെന്നിത്തല. തദ്ദേശ തിരഞ്ഞെടുപ്പില് തുടങ്ങി വെച്ച വര്ഗീയ ചേരിതിരുവുണ്ടാക്കാനുളള ശ്രമം ഇപ്പോഴും സിപിഎം തുടരുകയാണെന്നും അദ്ദേഹം ആരോപിച്ചു.
മതമൗലികവാദികളുമായുള്ള കൂട്ടുകെട്ട് വിപുലീകരിക്കുകയായിരുന്നു ഇരുവരുടെയും സന്ദര്ശന ലക്ഷ്യമെന്നായിരുന്നു വിജയരാഘവന് പറഞ്ഞത്. ഇതിന്റെ പശ്ചാത്തലത്തിലാണ് വിജയരാഘവനെ രൂക്ഷമായി വിമര്ശിച്ച് രമേശ് ചെന്നിത്തല രംഗത്തെത്തിയത്.
‘എല്ലാ മതവിഭാഗങ്ങളെയും ഒരുമിച്ച് കൊണ്ടുപോകേണ്ട സര്ക്കാര് വര്ഗീയ പ്രചാരണത്തിന് കുടപിടിക്കുന്നു. മുഖ്യമന്ത്രിയാണ് ഇതിന് തുടക്കം കുറിച്ചത്. കോണ്ഗ്രസും യുഡിഎഫും മതേതര നിലപാടുകള് ഉയര്ത്തിപ്പിടിക്കുന്ന പ്രസ്ഥാനമാണ്. ഞങ്ങളെ പഠിപ്പിക്കാന് വിജയരാഘവന് വളര്ന്നിട്ടില്ല. മുന്നണിയിലെ ഘടകകക്ഷികളുമായി ചര്ച്ച നടത്തിയാല് അതില് വര്ഗീയത കണ്ടെത്താന് ഇടുങ്ങിയ മനസ്സിന്റെ ഉടമകള്ക്ക് മാത്രമേ കഴിയൂ. അത് കേരളം അംഗീകരിക്കില്ല.’- ചെന്നിത്തല പറഞ്ഞു.