പത്തനംതിട്ട: ശബരിമല സ്ത്രീപ്രവേശന വിഷയത്തില് ദേവസ്വം ബോര്ഡ് സാവകാശി ഹര്ജി നല്കാന് ഒരുങ്ങുന്നു. പറ്റുമെങ്കില് നാളെ തന്നെ ഹര്ജി നല്കുമെന്നാണ് ദേവസ്വം പ്രസിഡന്റ് എ. പത്മകുമാര് പറഞ്ഞത്. ആചാരങ്ങളില് വിട്ടു വീഴ്ചയ്ക്കില്ലെന്നും അദ്ദേഹം വ്യക്തമാക്കി.
അതേസമയം, ശബരിമലയില് ദര്ശനത്തിന് എത്തിയ തൃപ്തി ദേശായിയ്ക്കു നേരെ പ്രതിഷേധം ശക്തമായിരുന്നു. തൃപ്തി ദേശായിയെ തടഞ്ഞു കൊണ്ട് നെടുമ്പാശേരി വിമാനത്താവളത്തിനു മുന്നില് പ്രതിഷേധിച്ചവര്ക്കെതിരെ പൊലീസ് കേസെടുക്കുകയും ചെയ്തിരുന്നു. കണ്ടാലറിയാവുന്ന 250പേര്ക്കെതിരെയാണ് കേസെടുത്തിരിക്കുന്നത്. സമരങ്ങള് നിരോധിച്ച മേഘലയില് പ്രതിഷേധിച്ചതിനാണ് ഇവര്ക്കെതിരെ കേസെടുത്തിരുന്നത്.
ശബരിമല തീര്ത്ഥാടനത്തിനായി ഇന്ന് രാവിലെ നെടുമ്പാശേരിയിലെത്തിയ തൃപ്തി ദേശായിയെ ശബരിമലയിലേക്ക് മാത്രമല്ല, കൊച്ചിയിലെ ഹോട്ടലിലേക്ക് പോലും പോകാന് അനുവദിക്കില്ലെന്ന് പ്രതിഷേധക്കാര് പറഞ്ഞിരുന്നു. രാവിലെ 4.45ന് ഇന്റിഗോ വിമാനത്തിലെത്തിയ തൃപ്തി ദേശായിയും മറ്റ് അഞ്ച് സ്ത്രീകളും പുറത്തിറങ്ങാനാവാതെ ഇപ്പോഴും വിമാനത്താവളത്തിനുള്ളില് തന്നെ തുടരുകയാണ്.