ഡൽഹി: കോണ്ഗ്രസ് ദേശീയ അധ്യക്ഷ തെരഞ്ഞെടുപ്പില് മത്സരിക്കുമെന്നുള്ള അഭ്യൂഹങ്ങള്ക്കിടെ ശശി തരൂര് എംപിയും സോണിയ ഗാന്ധിയും തമ്മിൽ കൂടിക്കാഴ്ച നടത്തി. ദില്ലി ജന്പഥിലെ സോണിയ ഗാന്ധിയുടെ വസതിയില് കൂടിക്കാഴ്ച ഒരു മണിക്കൂറോളം നീണ്ടു. തെരഞ്ഞെടുപ്പിലെ മത്സര സാധ്യതയടക്കം ചര്ച്ചയായെന്നാണ് സൂചന. അശോക് ഗലോട്ട് മത്സരത്തിനിറങ്ങിയാല് തരൂര് മത്സരിച്ചേക്കുമെന്ന് അഭ്യൂഹങ്ങളുണ്ട്.
അതേസമയം മഹാരാഷ്ട്ര, ജമ്മുകശ്മീര്, യുപി കോണ്ഗ്രസ് ഘടകങ്ങളും രാഹുല് ഗാന്ധി അധ്യക്ഷനാകണമെന്ന പ്രമേയം പാസാക്കി. ഇന്നലെ രാജസ്ഥാന്, ഛത്തീസ്ഗണ്ഡ്, ഗുജാറാത്ത് ഘടകങ്ങള് രാഹുല് തിരിച്ചുവരണമെന്ന് ആവശ്യപ്പെട്ടിരുന്നു. അധ്യക്ഷ സ്ഥാനത്തേക്കില്ലെന്ന സൂചന രാഹുൽ ഗാന്ധി നല്കുമ്പോഴും സമ്മര്ദ്ദത്തിനാണ് ഒരു വിഭാഗം നേതാക്കളുടെ ശ്രമം. രാഹുല് അധ്യക്ഷനായില്ലെങ്കില് പാര്ട്ടിയില് ഐക്യമുണ്ടാകില്ല. മറ്റാരേയും അംഗീകരിക്കാന് പ്രവര്ത്തകര് തയ്യാറായേക്കില്ല. വരാനിരിക്കുന്ന ലോക്സഭ തെരഞ്ഞെടുപ്പില് രാഹുല്തന്നെ പാര്ട്ടിയെ നയിക്കണമെന്നും പ്രമേയങ്ങള് ആവശ്യപ്പെടുന്നു.