മെക്‌സിക്കോ: മെക്‌സിക്കോയിലെ വടക്കുകിഴക്കന്‍ സംസ്ഥാനമായ ബജ കലിഫോര്‍ണിയയിൽ മാധ്യമപ്രവര്‍ത്തകന്‍ വെടിയേറ്റ് മരിച്ചു.
ലൂസിയാനോ റിവേര എന്ന മാധ്യമപ്രവര്‍ത്തകനാണ് കൊല്ലപ്പെട്ടത്. മാര്‍ച്ച് മുതല്‍ ജൂലൈ അവസാനം വരെയുള്ള കാലയളവില്‍ ആറ് മാധ്യമപ്രവര്‍ത്തകരാണ് മെക്‌സിക്കോയില്‍ കൊല്ലപ്പെട്ടത്.
ബജ കലിഫോര്‍ണിയയിലെ റൊസാരിറ്റോ നഗരത്തിലുള്ള ബാറില്‍ വച്ചാണ് 33കാരനായ റിവേരയ്ക്ക് വെടിയേറ്റത്. തലയ്ക്ക് വെടിയേറ്റ റിവേര തല്‍ക്ഷണം മരിക്കുകയായിരുന്നു.
സംഭവവുമായി ബന്ധപ്പെട്ട് ആല്‍ഫ്രെഡോ എന്ന യുവാവിനെ പോലീസ് അറസ്റ്റ് ചെയ്തു. ഇയാളാണ് വെടിയുതിര്‍ത്തതെന്ന് വ്യക്തമായെന്നും ഇയാള്‍ സഞ്ചരിച്ച വാഹനം കസ്റ്റഡിയിലെടുത്തെന്നും പോലീസ് അറിയിച്ചു.
വെടിവയ്പിന് കാരണമെന്താണെന്ന് വ്യക്തമല്ലെന്നും പോലീസ് പറഞ്ഞു. 2017ല്‍ ഇതുവരെ 10 മാധ്യമ പ്രവര്‍ത്തകര്‍ക്കാണ് മെക്‌സിക്കോയില്‍ ജീവന്‍ നഷ്ടപ്പെട്ടത്.
