മലപ്പുറം: കൊണ്ടോട്ടി കിഴിശ്ശേരിയില്‍ പഞ്ചകര്‍മ മസാജിംഗ് സെന്റെറിന്റെ മറവില്‍ മയക്കുമരുന്ന്- കഞ്ചാവ് വില്‍പന. നാല് കിലോ കഞ്ചാവുമായി വ്യാജ വൈദ്യനും കൂട്ടാളിയും ആന്‍റി നര്‍ക്കോട്ടിക് സ്ക്വാഡിന്‍റെ പിടിയിലായി.
കിഴിശ്ശേരി അല്‍ ഹബീബ് അക്യു – പഞ്ചകര്‍മ മസാജിംഗ് സെന്റെറിന്റെ മറവിലാണ് മയക്കുമരുന്ന്- കഞ്ചാവ് വില്‍പന നടന്നിരുന്നത്. നാട്ടുവൈദ്യ ചികിത്സയും അക്യുപഞ്ചര്‍, മാറാത്ത അസുഖങ്ങള്‍ മാറ്റുന്നു എന്ന പേരുകളില്‍ ലഹരി കച്ചവടമാണ് കിഴിശ്ശേരി കുഴിമണ്ണ സ്വദേശി മുഹമ്മദ് എന്ന ഹിജാമ മുഹമ്മദ് നടത്തിയിരുന്നത്.
ജിഎല്‍പി സ്‌കൂള്‍ കിഴിശ്ശേരിക്ക് തൊട്ടു മുന്‍പിലാണ് വ്യാജ ചികിത്സ കേന്ദ്രം പ്രവര്‍ത്തിച്ചിരുന്നത്. ഇയാളുടെ വ്യാജ ചികിത്സ മൂലം അപകടം പറ്റിയ സംഭവങ്ങളും ഉണ്ടായിട്ടുണ്ട്. വില്‍പനയ്ക്ക് പുറമെ കഞ്ചാവ് വലിക്കാനുള്ള സൗകര്യവും സ്ഥാപനത്തില്‍ ഒരുക്കി നല്‍കിയിരുന്നു. കഞ്ചാവ് പുകച്ച് ഉപയോഗിക്കാനുള്ള ഉപകരണവും പിടിച്ചെടുത്തു.
കൊണ്ടോട്ടി പൊലീസ് കേസെടുത്ത് അന്വേഷണം ആരംഭിച്ചു.
