പത്തനംതിട്ട: നിരോധനാജ്ഞ നിലനില്‍ക്കുന്ന നിലയ്ക്കലില്‍ വീണ്ടും പ്രതിഷേധം. ബിജെപി നേതാക്കളുടെ നേതൃത്വത്തിലുള്ള പത്ത് പേരടങ്ങിയ സംഘമാണ് ഇവിടെയെത്തിയത്. ദേവസ്വം മന്ത്രി കടകംപള്ളി സുരേന്ദ്രനെതിരെയും മുഖ്യമന്ത്രി പിണറായി വിജയനെതിരെയും ഇവര്‍ മുദ്രാവാക്യം വിളിച്ചു.
നാലില്‍ കൂടുതല്‍ ആളുകള്‍ സംഘമായി എത്തിയാല്‍ പോലീസിന് അവരെ കസ്റ്റഡിയിലെടുക്കാം എന്നാണ് 144-നിരോധാനാജ്ഞ അനുശാസിക്കുന്നത്. എന്നാല്‍, ബിജെപി നേതാക്കളായി എ എന്‍ രാധാകൃഷ്ണന്‍, ജെ. ആര്‍ പത്മകുമാര്‍ എന്നിവരുടെ നേതൃത്വത്തിലുള്ള സംഘമാണ് ഇവിടെയെത്തിയത്.
കനത്ത പോലീസ് സുരക്ഷയെ മറികടന്നാണ് ഇവര്‍ നിലയ്ക്കലില്‍ എത്തിയത്. ബിജെപി നേതാക്കളെ പോലീസ് അറസ്റ്റ് ചെയ്ത് നീക്കി.ഇന്നു രാവിലെ മുതല്‍ വലിയ സുരക്ഷാ സംവിധാനങ്ങളാണ് പോലീസ് ഒരുക്കിയിരുന്നത്. ഓരോ വാഹനങ്ങളും പരിശോധിച്ച് ഭക്തരെ മാത്രമേ സന്നിധാനത്തേയ്ക്ക് കടത്തി വിട്ടിരുന്നുള്ളൂ. എന്നാല്‍ ഇതിനെയൊക്കെ മറികടന്നാണ് ബിജെപി നേതാക്കള്‍ നിലയ്ക്കലില്‍ എത്തിയത്.
