പൃഥ്വിരാജിന് നായികയായി നൈലാ ഉഷ എത്തുന്നു. ഹൗ ഓള്‍ഡ് ആര്‍ യു എന്ന ഹിറ്റ് ചിത്രത്തിന് ശേഷം സംവിധായകന്‍ റോഷന്‍ ആന്‍ഡ്രൂസ് അടുത്തതായി സംവിധാനം ചെയ്യുന്ന നാളെ രാവിലെ എന്ന ചിത്രത്തിലാണ് ഇരുവരും ഒന്നിക്കുന്നത്. ബോബി-സഞ്ജയ് ടീമാണ് ചിത്രത്തിന്റെ തിരക്കഥ തയ്യാറാക്കുന്നത്.
ഇതാദ്യമായാണ് പൃഥ്വിരാജും നൈല ഉഷയും ഒന്നിച്ച് അഭിനയിക്കുന്നത്. മുംബയ് പൊലീസ് എന്ന ചിത്രത്തിന് ശേഷം പൃഥ്വിരാജ്, റോഷന്‍ ആന്‍ഡ്രൂസ്, ബോബി സഞ്ജയ് ടീം ഒന്നിക്കുന്നെന്ന പ്രത്യേകതയും ഈ ചിത്രത്തിനുണ്ട്.
സംവിധായകന്റെ സ്വപ്ന പദ്ധതിയാണ് ഈ ചിത്രം. കഴിഞ്ഞ പത്ത് വര്‍ഷമായി താന്‍ ഈ ചിത്രത്തിന് വേണ്ടി പ്രവര്‍ത്തിക്കുകയാണെന്ന് റോഷന്‍ മുമ്പ് പറഞ്ഞിരുന്നു. ഇത് അത്ഭുതങ്ങളെപ്പറ്റിയുള്ള സിനിമയാണെന്ന് മാത്രമാണ് അദ്ദേഹം പറഞ്ഞിരിക്കുന്നത്. ഒരു മനുഷ്യന്റെ ജീവിതത്തില്‍ സംഭവിക്കുന്ന അത്ഭുതങ്ങളാണ് ചിത്രത്തിന്റെ ഇതിവൃത്തം. ഇതൊരു മുഴുനീള പ്രണയചിത്രമാണ്. വ്യത്യസ്തമായ ലുക്കിലായിരിക്കും പൃഥ്വിരാജ് ഈ ചിത്രത്തില്‍ പ്രത്യക്ഷപ്പെടുക.
ഹൗ ഓള്‍ഡ് ആര്‍ യുവിന്റെ തമിഴ് പതിപ്പിന്റെ ജോലി പൂര്‍ത്തിയാക്കിയ ശേഷമായിരിക്കും ഈ ചിത്രത്തിന്റെ പ്രവര്‍ത്തനങ്ങള്‍ ആരംഭിക്കുക. തന്റെ കരിയറിലെ ഏറ്റവും വ്യത്യസ്തമായ ചിത്രമായിരിക്കും ഇതെന്നും പ്രേക്ഷകര്‍ക്കും ഇത് വേറിട്ടൊരു അനുഭവമായിരിക്കുമെന്നും റോഷന്‍ വ്യക്തമാക്കി. എ. വി. എ പ്രൊഡക്ഷന്‍സിന്റെ ബാനറില്‍ ഡോ. കെ. വി അനൂപാണ് ചിത്രം നിര്‍മ്മിക്കുന്നത്. കാമറ: ദിവാകര്‍. ജൂലായില്‍ ചിത്രീകരണം ആരംഭിക്കും.
