ഷില്ലോങ്: പ്രധാനമന്ത്രിക്ക് നേരെ ആത്മഹത്യാ ഭീഷണിയുമായി മേഘാലയിലെ ബിജെപി സ്ഥാനാര്‍ഥി. പൗരത്വ ഭേദഗതി ബില്‍ നടപ്പിലാക്കുകയാണെങ്കില്‍ പിന്നെ ജീവിച്ചിരിക്കില്ലെന്നും അങ്ങനെ നടന്നാല്‍ നരേന്ദ്ര മോദിക്ക് മുന്നില്‍ ജീവന്‍ അവസാനിപ്പിക്കുമെന്നും ഷില്ലോങിലെ ബിജെപി സ്ഥാനാര്‍ഥിയായ സന്‍ബോര്‍ ഷുള്ളൈ പറഞ്ഞു.
ഞാന്‍ ജീവിച്ചിരിക്കുന്നിടത്തോളം കാലം വടക്ക് കിഴക്കന്‍ സംസ്ഥാനങ്ങളില്‍ പൗരത്വ ഭേദഗതി ബില്‍ നടപ്പില്‍ വരുത്താന്‍ സമ്മതിക്കില്ല. അങ്ങനെ നടന്നാല്‍ നരേന്ദ്ര മോദിക്ക് മുന്നില്‍ ജീവന്‍ അവസാനിപ്പിക്കും. ഇന്ത്യയുടെ മറ്റു ഭാഗങ്ങളില്‍ ഇത് നടപ്പാക്കിയാല്‍ പ്രശ്നമില്ല. മേഘാലയിലും വടക്ക് കിഴക്ക് സംസ്ഥാനങ്ങളിലും ഇതിന് അനുവദിക്കില്ല. പ്രധാനമന്ത്രി നരേന്ദ്ര മോദിക്കും മറ്റു നേതാക്കള്‍ക്കും ഞാന്‍ ഇതുസംബന്ധിച്ച് കത്തയച്ചിട്ടുണ്ട്. പൗരത്വ ഭേദഗതി ബില്‍ നടപ്പാക്കുകയാണെങ്കില്‍ വടക്ക് കിഴക്കന്‍ സംസ്ഥാനങ്ങളെ ഒഴിവാക്കി തരണമെന്നാണ് ആവശ്യപ്പെട്ടിരിക്കുന്നത്.- സന്‍ബോര്‍ ഷുള്ളൈ പറഞ്ഞു.
അതേ സമയം അധികാരത്തില്‍ തുടരുകയാണെങ്കില്‍ പൗരത്വഭേദഗതി ബില്‍ നടപ്പിലാക്കുമെന്ന് ബിജെപി പ്രകടനപത്രികയിലും മോദിയടക്കമുള്ള നേതാക്കളുടെ പ്രസംഗത്തിലും ആവര്‍ത്തിക്കുന്നുണ്ട്.
