മിര്‍പുര്‍: ടെസ്റ്റ് ക്രിക്കറ്റില്‍ 400 വിക്കറ്റ് നേട്ടം കൈവരിച്ചവരുടെ പട്ടികയിലേക്ക് ലോക ഒന്നാം നമ്പര്‍ ഫാസ്റ്റ്ബൗളര്‍ ദക്ഷിണാഫ്രിക്കയുടെ ഡെയ്ല്‍ സ്റ്റെയ്‌നും. ബംഗ്ലാദേശിനെതിരായ രണ്ടാം ക്രിക്കറ്റ് ടെസ്റ്റിന്റെ ആദ്യദിനം ഓപ്പണിങ് ബാറ്റ്‌സ്മാന്‍ തമീം ഇഖ്ബാലിനെ പുറത്താക്കിയാണ് 400 എന്ന നാഴികക്കല്ല് സ്റ്റെയ്ന്‍ പിന്നിട്ടത്.
പിന്നീട് രണ്ടു വിക്കറ്റുകള്‍കൂടി വീഴ്ത്തി മൊത്തം വിക്കറ്റുനേട്ടം 402 ആയി ഉയര്‍ത്താനും സ്റ്റെയ്‌നിനുകഴിഞ്ഞു.
ടെസ്റ്റില്‍ 400 വിക്കറ്റ് കൈക്കലാക്കുന്ന 13ാമത്തെ ബൗളറാണ് 32കാരനായ സ്റ്റെയ്ന്‍. ദക്ഷിണാഫ്രിക്കയ്ക്കുവേണ്ടി 400 തികച്ച രണ്ടാമത്തെ ബൗളര്‍കൂടിയാണ് സ്റ്റെയ്ന്‍. മുന്‍ നായകന്‍ ഷോണ്‍ പോളോക്കാണ് (421) ഈ നേട്ടത്തിനുടമയായ ആദ്യ ദക്ഷിണാഫ്രിക്കന്‍ ബൗളര്‍.
