കൊച്ചി: നടി ആക്രമിക്കപ്പെട്ട കേസുമായി ബന്ധപ്പെട്ട് ദൃശ്യങ്ങള് ഒഴികെയുള്ള മറ്റ് രേഖകള് പ്രതികള്ക്ക് നല്കാമെന്ന് എറണാകുളം പ്രിന്സിപ്പല് സെഷന്സ് കോടതിയുടെ ഉത്തരവ്.
ദൃശ്യങ്ങള് വേണമെന്ന ദിലീപിന്റെ ആവശ്യം ഹൈക്കോടതിയുടെ പരിഗണനയിലാണെന്നും അക്കാര്യത്തില് ഹൈക്കോടതി തീരുമാനമെടുക്കട്ടെയെന്നും പ്രിന്സിപ്പല് സെഷന്സ് കോടതി അറിയിച്ചു. നടിയുടെ മെഡിക്കല് പരിശോധനാ ഫലം ഉള്പ്പെടെയുള്ള രേഖകള് കൈമാറാമെന്നും കോടതി വ്യക്തമാക്കി. വിശദമായ വാദം കേള്ക്കാനായി കേസ് ഈ മാസം 28ലേക്ക് മാറ്റി.
അതേസമയം കേസില് വിവിധ ആവശ്യങ്ങള് ഉന്നയിച്ച് നടിയുടെ അഭിഭാഷകനും കോടതിയില് ഹര്ജി നല്കിയിട്ടുണ്ട്. കേസിന്റെ വിചാരണയ്ക്ക് വേണ്ടി പ്രത്യേക കോടതി വേണമെന്നും കേസില് രഹസ്യ വിചാരണ അനുവദിക്കണമെന്നും വനിതാ ജഡ്ജിയുടെ മേല്നോട്ടത്തില് വിചാരണ നടത്തണമെന്നുമാണ് നടിയുടെ ഹര്ജിയിലെ ആവശ്യങ്ങള്.