സിപിഐഎം കണ്ണൂരിലെ ഗുണ്ടാപ്പടയുടെ ബലിഷ്ഠ കരങ്ങള്‍ക്കുള്ളിലെന്ന് കുമ്മനം രാജശേഖരന്‍

Kummanam rajasekharan

തിരുവനന്തപുരം: ജനാധിപത്യം, സ്വാതന്ത്ര്യം, സഹിഷ്ണുത തുടങ്ങിയ മാനവിക മൂല്യങ്ങള്‍ ആഗ്രഹിക്കുന്ന ഒരാള്‍ക്കും പ്രവര്‍ത്തിക്കാനാകാത്ത പാര്‍ട്ടിയായി കേരളത്തിലെ സിപിഐഎം മാറിയെന്ന് ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍. കണ്ണൂരിലെ ഗുണ്ടാപ്പടയുടെ ബലിഷ്ഠ കരങ്ങള്‍ക്കുള്ളിലാണ് സിപിഐഎം. പാര്‍ട്ടി നേതൃത്വത്തിനു പോലും നിയന്ത്രിക്കാനാകാത്ത വിധം കണ്ണൂര്‍ ലോബി ഇന്നു സിപിഐഎമ്മിനെ വരിഞ്ഞു മുറുക്കിയിരിക്കുകയാണെന്നും കുമ്മനം ഫേയ്‌സ്ബുക്കില്‍ കുറിച്ചു.

ഫെയ്‌സ്ബുക്ക് കുറിപ്പിന്റെ പൂര്‍ണരൂപം:

നെഹ്‌റുവിനുശേഷം ഇഎംഎസ് ചെങ്കോട്ടയില്‍ ചെങ്കൊടി ഉയര്‍ത്തുമെന്നു വീമ്പിളിക്കിയ സിപിഎം പാര്‍ട്ടി ഇന്നു ശത്രുവാര് മിത്രമാര് എന്നു തിരിച്ചറിയാനാകാതെ ഉഴറുകയാണ്. ഈ സാഹചര്യത്തിലാണ് ഇരുപത്തിരണ്ടാം പാര്‍ട്ടി കോണ്‍ഗ്രസിനു മുന്നോടിയായുള്ള സംസ്ഥാന സമ്മേളനം വ്യാഴാഴ്ച തൃശൂരില്‍ തുടങ്ങുന്നത്. ചൈനീസ് ബന്ധത്തിന്റെയും കോണ്‍ഗ്രസുമായുള്ള സമീപനത്തിന്റെയും പേരില്‍ നെടുകെ പിളര്‍ന്ന പാര്‍ട്ടി ഇന്ന് അതേ കാരണത്തില്‍ മറ്റൊരു പിളര്‍പ്പിന്റെ വക്കിലാണ്. 1964ല്‍ 32 പേരാണ് എതിര്‍പ്പുമായി പാര്‍ട്ടി വിട്ടതെങ്കില്‍ 2017ല്‍ അഖിലേന്ത്യാ ജനറല്‍ സെക്രട്ടറിയുടെ കോണ്‍ഗ്രസ് വിധേയത്വത്തിനെതിരെ 55 പേരാണു രംഗത്തു വന്നിരിക്കുന്നത്. പാര്‍ട്ടി ബംഗാള്‍ – കേരളാ ഘടകങ്ങളായി ചേരി തിരിഞ്ഞിരിക്കുന്ന അപൂര്‍വ സാഹചര്യവും നിലവിലുണ്ട്. കേന്ദ്രകമ്മിറ്റിയിലെ ഭൂരിഭാഗം അംഗങ്ങളും അവിശ്വാസം രേഖപ്പെടുത്തിയ ജനറല്‍ സെക്രട്ടറിക്ക് ആ സ്ഥാനത്തു തുടരാനുള്ള യോഗ്യതയുണ്ടോ?

കേവലം രണ്ടു സംസ്ഥാനങ്ങളില്‍ മാത്രം ഭരണമുള്ള പാര്‍ട്ടി ഇന്നു ത്രിപുരയില്‍നിന്നും ബഹിഷ്‌കൃതമാകുന്നതിന്റെ വക്കിലാണ്.

അല്‍പ്പമെങ്കിലും സ്വാധീനമുള്ള കേരളത്തിലാകട്ടെ, കണ്ണൂരിലെ ഗുണ്ടാപ്പടയുടെ ബലിഷ്ഠ കരങ്ങള്‍ക്കുള്ളിലുമാണ്. ജനാധിപത്യം, സ്വാതന്ത്ര്യം, സഹിഷ്ണുത തുടങ്ങിയ മാനവിക മൂല്യങ്ങള്‍ ആഗ്രഹിക്കുന്ന ഒരാള്‍ക്കും പ്രവര്‍ത്തിക്കാനാകാത്ത പാര്‍ട്ടിയായി കേരളത്തിലെ സിപിഎം മാറിയെന്നു സമ്മതിക്കുമല്ലോ? പാര്‍ട്ടി നേതൃത്വത്തിനു പോലും നിയന്ത്രിക്കാനാകാത്ത വിധം കണ്ണൂര്‍ ലോബി ഇന്നു സിപിഎമ്മിനെ വരിഞ്ഞു മുറുക്കിയിരിക്കുകയാണ്. വിളവു തിന്നുന്ന വേലിയാണ് ഇതിനു കാരണം. അണികള്‍ക്കു ലാളിത്യവും അച്ചടക്കവും പെരുമാറ്റച്ചട്ടവും ഏര്‍പ്പെടുത്തിയ നേതാക്കള്‍ ചങ്ങാത്ത മുതലാളിത്തത്തിന്റെ അടവു നയത്തിലൂടെ കമ്യൂണിസത്തിനു പുത്തന്‍ ഭാഷ്യം രചിച്ചു. കൊല്ലാനും കൊല്ലപ്പെടാനും അണികള്‍, ഭരണത്തണലില്‍ തടിച്ചു കൊഴുക്കുന്ന നേതാക്കള്‍. പാര്‍ട്ടിയിലെ ഈ അവസ്ഥയെ ആത്മാഭിമാനമുള്ള പ്രവര്‍ത്തകര്‍ തൃശൂര്‍ സമ്മേളനത്തില്‍ ചോദ്യം ചെയ്യുമെന്നു പ്രതീക്ഷിക്കുന്നു.

കേരളത്തിലെ പാര്‍ട്ടിയില്‍നിന്ന് പൊതുസമൂഹവും പാര്‍ട്ടി അണികളും ഉത്തരം തേടുന്ന ചില ചോദ്യങ്ങളുണ്ട്. ഇവയ്ക്കു സംസ്ഥാന സമ്മേളനത്തില്‍നിന്ന് ഉത്തരം കിട്ടുമെന്നാണു പ്രതീക്ഷ.

1. പാര്‍ട്ടിയെയും സഖാക്കളെയും നേര്‍വഴിക്കു നടത്താന്‍ 2013ല്‍ പാലക്കാട് ചേര്‍ന്ന പാര്‍ട്ടി പ്ലീനം കൈക്കൊണ്ട ഏതെങ്കിലും ഒരു തീരുമാനം സംസ്ഥാന സെക്രട്ടറിയടക്കം നടപ്പാക്കിയിട്ടുണ്ടോ?

2. ഗുണ്ടായിസവും ധാര്‍ഷ്ട്യവും മാത്രം കൈമുതലായിട്ടുള്ള ഇപ്പോഴത്ത സിപിഎം നേതാക്കള്‍ കോടീശ്വരന്‍മാരുടെ പട്ടികയില്‍ ഇടംപിടിച്ചത് എങ്ങനെ?

3. പാര്‍ട്ടിക്കു ലെവി കൊടുത്തതിനുശേഷവും കോടികള്‍ സമ്പാദിക്കാന്‍ സിപിഎമ്മിനു എന്താണു വരുമാനം?

4. പാര്‍ട്ടി സെക്രട്ടറിയുടെ മക്കളുടെ പേരിലുണ്ടായ സാമ്പത്തിക തട്ടിപ്പിന്റെ പിന്നമ്പുറക്കഥകള്‍ എന്താണ്?

5. കോടിയേരി ബാലകൃഷ്ണന്റെ രണ്ടു മക്കള്‍ വിദേശത്തു നടത്തുന്ന വ്യവസായം എന്താണെന്ന് അണികളോടെങ്കിലും വിശദീകരിക്കുമോ?

6. സാമാന്യ വിദ്യാഭ്യാസം മാത്രമുള്ള നേതാക്കളുടെ മക്കള്‍ വിദേശത്തു വന്‍കിട വ്യവസായ ഗ്രൂപ്പുകളുടെ തലപ്പത്ത് എത്തിയതെങ്ങനെ?

7. ഭൂപരിഷ്‌കരണം നടപ്പാക്കിയെന്നു വീമ്പിളിക്കുന്ന പാര്‍ട്ടിയുടെ ടിക്കറ്റില്‍ നൂറുകണക്കിന് ഏക്കര്‍ ഭൂമി സ്വന്തമായുള്ളവര്‍ എങ്ങനെ എംഎല്‍എമാരായി?

8. കൊലപാതക രാഷ്ട്രീയത്തെ അംഗീകരിക്കുന്നില്ലെന്നു പറയുന്ന പാര്‍ട്ടി പ്രതികള്‍ക്കായി കേസ് നടത്തുന്നതും പണപ്പിരിവു നടത്തുന്നതും എന്തിന്?

9. കൊലക്കേസില്‍ കോടതി ശിക്ഷിച്ച കുഞ്ഞനന്തന്‍ എങ്ങനെ വീണ്ടും പാര്‍ട്ടി ഭാരവാഹിയായി?

10. ശത്രുരാജ്യമായ ചൈനയെയും ഏകാധിപതിയായ ഉത്തര കൊറിയന്‍ ഭരണാധികാരിയെയും പുകഴ്ത്തുന്ന നേതാക്കളുടെ കൂറ് ആരോടാണ്?

11. അഴിമതിക്കാരനെന്നു മുദ്രകുത്തി ഒറ്റപ്പെടുത്തിയ കെ.എം. മാണിയെ ഇപ്പോള്‍ വിശുദ്ധനായി പ്രഖ്യാപിച്ചു പാര്‍ട്ടി സമ്മേളനത്തിലേക്കു ക്ഷണിക്കാനുള്ള കാരണം എന്താണ്?

12. ത്രിപുരയിലും ബംഗാളിലും കോണ്‍ഗ്രസുമായി സഹകരിച്ചു പ്രവര്‍ത്തിക്കുന്ന സിപിഎം കേരളത്തില്‍ എന്തുകൊണ്ടാണ് അവരുമായി കൂട്ടുചേരാത്തത്?

13. ബിജെപിയെ തോല്‍പ്പിക്കാന്‍ കോണ്‍ഗ്രസിനു വോട്ടു മറിക്കുന്ന കീഴ്വഴക്കം അവസാനിപ്പിക്കുമോ?

14. കേരളത്തിലെ കയ്യേറ്റക്കാരായ ഭൂമാഫിയയുമായി പാര്‍ട്ടി നേതാക്കള്‍ക്കുള്ള ബന്ധം വിശദീകരിക്കാന്‍ സാധിക്കുമോ?

15. കണ്ണൂരിലെ പാര്‍ട്ടി ഗ്രാമങ്ങള്‍ തീവ്രവാദികളുടെ ഒളിത്താവളമായി മാറുന്നതിന്റെ കാരണം വിശദീകരിക്കുമോ?

16. സിപിഎം ഭരണത്തില്‍ സ്ത്രീകളും പട്ടികജാതി പട്ടികവര്‍ഗക്കാരും മറ്റു പിന്നോക്ക വിഭാഗങ്ങളും ന്യൂനപക്ഷ വിഭാഗങ്ങളും കൊല ചെയ്യപ്പെടുന്നതും പീഡിപ്പിക്കപ്പെടുന്നതു എന്തു കൊണ്ടാണ്??

ഇങ്ങനെ ഉത്തരം കിട്ടേണ്ടതായ നിരവധി ചോദ്യങ്ങള്‍ ഇനിയുമുണ്ട്. വിസ്താര ഭയത്താല്‍ അവ ഇവിടെ പ്രതിപാദിക്കുന്നില്ല. മുന്‍പു പറഞ്ഞതെല്ലാം വിഴുങ്ങേണ്ടി വരുന്ന ഗതികേടിലാണ് ഇന്നു സിപിഎം. അധികാരത്തിന്റെയും പണക്കൊഴുപ്പിന്റെയും ഗര്‍വില്‍ പുളയുന്ന നേതാക്കള്‍ക്കും പാര്‍ട്ടിക്കും മുന്നോട്ടുവയ്ക്കാന്‍ ഒരു ബദല്‍ ഇല്ലാതായിട്ടു കാലം കുറേയായി. ഈ സമ്മേളനത്തിലും അതിന് മാറ്റം ഉണ്ടാകില്ലെന്ന് ഉറപ്പാണ്. ചോരക്കൊതിയന്‍മാരും മാഫിയകളും നയിക്കുന്ന ഈ പാര്‍ട്ടിയുടെ കരാളഹസ്തങ്ങളില്‍നിന്ന് ആത്മാഭിമാനമുള്ള പ്രവര്‍ത്തകര്‍ പുറത്തു വരണമെന്ന് അഭ്യര്‍ത്ഥിക്കുന്നു.

Top