രാജ്കോട്ട്: ഗുജറാത്ത് ലയണ്സിനെതിരേ കിംഗ്സ് ഇലവൻ പഞ്ചാബിന് ജയം. 189 റണ്സ് വിജയലക്ഷ്യവുമായി ബാറ്റിംഗിനിറങ്ങിയ ഗുജറാത്തിന് നിശ്ചിത ഓവറിൽ ഏഴു വിക്കറ്റ് നഷ്ടത്തിൽ 162 റണ്സ് മാത്രമാണ് നേടാൻ കഴിഞ്ഞത്. കിംഗ്സിന് 26 റണ്സ് വിജയം.
സ്കോർ: കിംഗ്സ് ഇലവൻ പഞ്ചാബ്- 188/7(20). ഗുജറാത്ത് ലയണ്സ്- 162/7(20).
ടോസ് നഷ്ടപ്പെട്ട് ബാറ്റിംഗിനിറങ്ങിയ പഞ്ചാബിന് തുടക്കത്തിൽതന്നെ മന്നൻ വോറയെ നഷ്ടമായി. തുടർന്ന് ഹാഷിം അംലയും ഷോണ് മാർഷും ഗ്ലെൻ മാക്സ്വെല്ലും ചേർന്ന് പഞ്ചാബ് ഇന്നിംഗ്സിനെ കരകയറ്റി. അംല(65), മാർഷ്(30), മാക്സ്വെൽ(31) എന്നിങ്ങനെയായിരുന്നു ഇവരുടെ സ്കോർ. അവസാന ഓവറുകളിൽ അക്സർ പട്ടേൽ നടത്തിയ വെടിക്കെട്ട്(17 പന്തിൽ 34) പഞ്ചാബ് സ്കോർ 188ൽ എത്തിച്ചു.
മറുപടി ബാറ്റിംഗിനിറങ്ങിയ ഗുജറാത്തിന് തുടർച്ചയായ ഇടവേളകളിൽ വിക്കറ്റുകൾ നഷ്ടപ്പെട്ടുകൊണ്ടിരുന്നു. 58 റണ്സ് നേടി പുറത്താകാതെ നിന്ന ദിനേശ് കാർത്തിക്കിനും 32 റണ്സ് നേടിയ സുരേഷ് റെയ്നക്കും പുറമേ മറ്റാർക്കും ഗുജറാത്ത് നിരയിൽ തിളങ്ങാൻ കഴിഞ്ഞില്ല. കിംഗ്സിനായി സന്ദീപ് ശർമ, കരിയപ്പ, അക്സർ പട്ടേൽ എന്നിവർ രണ്ടു വിക്കറ്റ് വീതം നേടി.