പ്രളയബാധിതരുടെ വീടും പരിസരവും വാര്‍ഡ് തല സമിതികളുടെ നേതൃത്വത്തില്‍ ശുചിയാക്കുമെന്ന്

തിരുവനന്തപുരം: സംസ്ഥാനത്തെ പ്രളയബാധിത സ്ഥലങ്ങളിലെ വീടുകളും പരിസരങ്ങളും വാര്‍ഡ് തല സമിതികളുടെ നേതൃത്വത്തില്‍ ശുചിയാക്കുമെന്ന് ഹരിതകേരള മിഷന്‍ വൈസ് ചെയര്‍ പേഴ്‌സണ്‍ ഡോ. ടി.എന്‍. സീമ.

ഹരിതകേരളം, ശുചിത്വ മിഷന്‍, ആരോഗ്യ വകുപ്പ്, തദ്ദേശ സ്വയംഭരണ വകുപ്പ് എന്നിവരുടെ സഹകരണത്തോടെ ഇതിനുവേണ്ട പദ്ധതികള്‍ ആവിഷ്‌കരിക്കുമെന്നും ടി.എന്‍. സീമ വ്യക്തമാക്കി.

വീടുകളിലേക്ക് തിരിച്ചെത്തി താമസമാരംഭിക്കുന്നതിന് വന്‍തോതിലുള്ള ശുചീകരണപ്രവര്‍ത്തനങ്ങള്‍ വേണ്ടിവരുമെന്നും, ഇതിനുള്ള പ്രവര്‍ത്തനങ്ങള്‍ക്ക് വാര്‍ഡുതലത്തില്‍ ആരോഗ്യവകുപ്പിന്റെ സാനിറ്റേഷന്‍ പ്രവര്‍ത്തകരുടെ നേതൃത്വത്തില്‍ ടീമുകളുണ്ടാക്കുമെന്നും, ശുചീകരണപ്രവര്‍ത്തനങ്ങള്‍ ആവശ്യമുള്ള വീടുകളുടെ കണക്കെടുത്ത് ആവശ്യമായ ശുചീകരണ വസ്തുക്കള്‍, പണിയായുധങ്ങള്‍ എന്നിവ ലഭ്യമാക്കുമെന്നും അവര്‍ അറിയിച്ചു.

മാത്രമല്ല, തൊഴിലുറപ്പു പ്രവര്‍ത്തകരുടെയും സന്നദ്ധ, യുവജന സംഘടനകളുടെയും സഹകരണം ഈ പ്രവര്‍ത്തനങ്ങളില്‍ ഉറപ്പാക്കുമെന്നും ടി.എന്‍. സീമ അറിയിച്ചു.

Top