ന്യൂഡല്ഹി : ഹൈക്കോടതിയുടെ കോടതിയലക്ഷ്യ നടപടി സ്റ്റേ ചെയ്യണമെന്ന് ആവശ്യപ്പെട്ട് മുന് വിജിലന്സ് ഡയറക്ടര് ജേക്കബ് തോമസ് സുപ്രിംകോടതിയെ സമീപിച്ചു. ഹൈക്കോടതി ജഡ്ജിമാര്ക്കെതിരെ ആരോപണം ഉന്നയിച്ചിട്ടില്ലെന്ന് ജേക്കബ് തോമസ് ഹര്ജിയില് ചൂണ്ടിക്കാട്ടിയിട്ടുണ്ട്.
ഹൈക്കോടതി ജഡ്ജിമാര്ക്ക് എതിരെ കേന്ദ്രവിജിലന്സ് കമ്മീഷന് അയച്ച പരാതിയില് ആരോപണം ഉന്നയിക്കുകയും ഇത് മാധ്യമങ്ങളിലൂടെ ജേക്കബ് തോമസ് പ്രചരിപ്പിക്കുകയും ചെയ്തു എന്ന പരാതിയിലാണ് ഹൈക്കോടതി കോടതി അലക്ഷ്യ നടപടി ആരംഭിച്ചത്.
ഏപ്രില് രണ്ടിന് ഹൈക്കോടതിയില് നേരിട്ട് ഹാജരായി വിശദീകരണം നല്കാന് ജേക്കബ് തോമസിനോട് ചീഫ് ജസ്റ്റിസ് അധ്യക്ഷനായ ബെഞ്ച് നിര്ദേശിച്ചിരുന്നു. ഇതിനിടയിലാണ് ഹൈക്കോടതിയിലെ കോടതി അലക്ഷ്യ നടപടികള് സ്റ്റേ ചെയ്യണമെന്ന് ആവശ്യപ്പെട്ട് ജേക്കബ് തോമസ് സുപ്രിം കോടതിയില് ഹര്ജി ഫയല് ചെയ്തത്.