ന്യൂഡല്ഹി: സി.ബി.ഐ. ഇടക്കാല ഡയറക്ടറായി രാകേഷ് അസ്താനയെ നിയമിച്ചതില് സുപ്രീംകോടതി കേന്ദ്ര സര്ക്കാരിനോട് വിശദീകരണം ആരാഞ്ഞു.
ഈ മാസം 16 നകം വിശദീകരണം നല്കാനാണ് ആവശ്യപ്പെട്ടിരിക്കുന്നത്. നിയമനം ചോദ്യംചെയ്ത് സുപ്രീംകോടതിയില് സമര്പ്പിച്ച പൊതുതാത്പര്യ ഹര്ജിയിലാണ് ഉത്തരവ്.
എന്.ജി.ഒ.യായ കോമണ് കോസിനുവേണ്ടി അഭിഭാഷകനായ പ്രശാന്ത് ഭൂഷണാണ് ഈ നിയമനം കേന്ദ്രം അനധികൃതമായ രീതിയില് നടത്തിയെന്നുകാണിച്ച് കോടതിയെ സമീപിച്ചത്.
പ്രധാനമന്ത്രി, പ്രതിപക്ഷ നേതാവ്, ചീഫ് ജസ്റ്റിസ് എന്നിവരടങ്ങുന്ന സെലക്ഷന് കമ്മിറ്റിയുടെ യോഗം സര്ക്കാര് വിളിച്ചുകൂട്ടിയില്ല, ഡല്ഹി സ്പെഷ്യല് പൊലീസ് എസ്റ്റാബ്ലിഷ്മെന്റ് ആക്ട് 1946ന്റെ 4 എ വകുപ്പിന്റെ ലംഘനമാണിതെന്നും ഹര്ജിയില് ഉന്നയിച്ചിരുന്നു.
1984 ബാച്ചിലെ ഗുജറാത്ത് കേഡര് ഉദ്യോഗസ്ഥനായ അസ്താനയെ ഡിസംബര് രണ്ടിന് സി.ബി.ഐ. പ്രത്യേക ഡയറക്ടര് സ്ഥാനത്തേക്ക് നിയമിച്ചിരുന്നു. ഈ സ്ഥാനത്തുണ്ടായിരുന്ന ആര്.കെ. ദത്തയെ ആഭ്യന്തരകാര്യ മന്ത്രാലയത്തിന്റെ പ്രത്യേക സ്പെഷ്യല് സെക്രട്ടറിസ്ഥാനത്ത് നിയമിച്ചു.
പ്രത്യേക ഡയറക്ടര് സ്ഥാനത്തുനിന്ന് ദത്തയെ മാറ്റിയത് കാലാവധി കഴിയുന്നതിനുമുന്പാണെന്ന് ഹര്ജിയില് വ്യക്തമാക്കുന്നു. അനില്സിന്ഹ സി.ബി.ഐ. ഡയറക്ടര്സ്ഥാനത്തുനിന്ന് മാറുന്നതിന് രണ്ടുദിവസം മുമ്പാണ് ദത്തയെ സ്ഥാനംമാറ്റിയത്. ഡിസംബര് രണ്ടിനാണ് സിന്ഹ മാറിയത്.