കൊച്ചി: താരസംഘടനയായ ‘അമ്മ’യുടെ വൈസ് പ്രസിഡന്റുമാരിലൊരാളായ കെ.ബി.ഗണേഷ് കുമാറിന്റെ ശബ്ദസന്ദേശം ചോര്‍ന്ന സംഭവത്തില്‍ സ്വകാര്യ സൈബര്‍ ഏജന്‍സിയെ അന്വേഷണ ചുമതലയേര്‍പ്പെടുത്തി. അമ്മയുടെ ജനറല്‍ സെക്രട്ടറിയായ ഇടവേള ബാബുവിന് അയച്ച സന്ദേശമായിരുന്നു ചോര്‍ന്നത്.
താര സംഘടനയായ അമ്മയുമായി ബന്ധപ്പെട്ട് പുറത്തു വരുന്ന വാര്‍ത്തകള്‍ രണ്ട് ദിവസം കൊണ്ട് അടങ്ങുമെന്നും രാജിവെച്ച നടിമാര്‍ ‘അമ്മ’യോട് ശത്രുത പുലര്‍ത്തുന്നവരും സ്ഥിരമായി കുഴപ്പങ്ങള്‍ സൃഷ്ടിക്കുന്നവരുമാണെന്ന് ഗണേഷ് കുമാര്‍ പറഞ്ഞതാണ് ശബ്ദസന്ദേശമെത്തിയത്. ‘അമ്മ’ക്കെതിരെ രാഷ്ട്രീയക്കാര്‍ വിമര്‍ശനം ഉന്നയിക്കുന്നത് കൈയ്യടി നേടാന്‍ വേണ്ടിമാത്രമാണെന്നും ഇപ്പോള്‍ പുറത്തുവരുന്ന വിവാദങ്ങള്‍ ഉന്നയിക്കുന്നത് ഒരുപണിയും ഇല്ലാത്ത രാഷ്ട്രീയക്കാരാണെന്നും ഗണേഷ് കുമാര്‍ ശബ്ദ സന്ദേശത്തില്‍ പറഞ്ഞിരുന്നു.
